Adani | అదానీ కేసు అటకెక్కినట్టే?.. ఎఫ్‌సీపీఏను నిలిపేస్తూ ట్రంప్‌ ఆదేశం!

అమెరికాలో అమలులో ఉన్న ఫారిన్‌ కరప్ట్‌ ప్రాక్టీసెస్‌ యాక్ట్‌(ఎఫ్‌సీపీఏ)ను నిలిపివేయాలని న్యాయ శాఖను అధ్యక్షుడు డొనాల్డ్‌ ట్రంప్‌ ఆదేశించారు. ఈ మేరకు ఆయన ఎగ్జిక్యూటివ్‌ ఆర్డర్‌ను జారీ చేశారు.

• ఎఫ్‌సీపీఏను నిలిపేస్తూ ట్రంప్‌ కార్యనిర్వాహక ఆదేశం
• ఇదే చట్టం కింద అదానీపై అమెరికాలో అభియోగాలు
• మోదీ అమెరికా పర్యటన ముందు కీలక పరిణామం

Adani | వాషింగ్టన్‌, ఫిబ్రవరి 11: అమెరికాలో అమలులో ఉన్న ఫారిన్‌ కరప్ట్‌ ప్రాక్టీసెస్‌ యాక్ట్‌ (ఎఫ్‌సీపీఏ)ను నిలిపివేయాలని న్యాయ శాఖను అధ్యక్షుడు డొనాల్డ్‌ ట్రంప్‌ ఆదేశించారు. ఈ మేరకు ఆయన ఎగ్జిక్యూటివ్‌ ఆర్డర్‌ను జారీ చేశారు. ఈ చట్టం వినడానికి బాగానే ఉన్నా దేశానికి నష్టం చేస్తున్నదని, జైలు భయంతో అమెరికా కంపెనీలు ఒప్పందాలు కుదుర్చుకోలేకపోతున్నాయని ట్రంప్‌ పేర్కొన్నారు. అమెరికన్‌ కంపెనీలు అంతర్జాతీయంగా చట్టాలను ఉల్లంఘనలకు పాల్పడకుండా 1977లో అమెరికా ఈ చట్టాన్ని చేసింది. అమెరికాలో లంచాలు ఇచ్చే విదేశీయులు, విదేశీ సంస్థలను కూడా ఈ చట్టం పరిధిలోకి తెస్తూ 1998లో సవరించారు.

ఈ చట్టం కిందే అదానీపై అభియోగాలు

ఎఫ్‌సీపీఏను నిలిపివేయడం గౌతమ్‌ అదానీకి భారీ ఊరట కలిగించనుంది. అదానీ, ఆయన అనుచరులు భారత్‌లో విద్యుత్తు కాంట్రాక్టులు పొందేందుకు భారతీయ అధికారులకు భారీగా లంచాలు ఎర వేశారని గత ఏడాది అమెరికా డిపార్ట్‌మెంట్‌ ఆఫ్‌ జస్టిస్‌(డీఓజే) ఈ చట్టం కిందనే అభియోగాలు మోపింది. అదానీ సంస్థల్లో కొందరు పెట్టుబడిదారులు అమెరికన్లు కావడంతో ఈ చట్టం వర్తించింది.

ఇప్పుడు ఈ చట్టాన్నే నిలిపివేస్తూ ట్రంప్‌ ఉత్తర్వులు ఇవ్వడంతో అదానీ సంస్థపై విచారణ నిలిచిపోయే అవకాశం ఉంది. కాగా, ప్రధానమంత్రి నరేంద్ర మోదీ పర్యటనకు ఒక రోజు ముందు ట్రంప్‌ ఈ నిర్ణయం తీసుకోవడం గమనార్హం. ఈ నెల 12, 13 తేదీల్లో మోదీ అమెరికాలో పర్యటించనున్నారు.