100 జీబీపీఎస్‌ వేగంతో 6జీ చైనా సంస్థ సరికొత్త రికార్డు

ఆరో తరం వైర్‌లెస్‌ సమాచార సాంకేతికత 6జీలో చైనాకు చెందిన చాంగ్‌ గువాంగ్‌ శాటిలైట్‌ టెక్నాలజీ సంస్థ సరికొత్త రికార్డును సృష్టించింది. ఈ సంస్థ అంతరిక్షం నుంచి భూమిపైకి లేజర్‌ ట్రాన్స్‌మిషన్‌తో సెకనుకు 100 గిగాబిట్ల(జీబీపీఎస్‌) డాటాను పంపించగలిగినట్టు సౌత్‌ చైనా మార్నింగ్‌ పోస్ట్‌ ఒక కథనాన్ని ప్రచురించింది.

బీజింగ్‌: ఆరో తరం వైర్‌లెస్‌ సమాచార సాంకేతికత 6జీలో చైనాకు చెందిన చాంగ్‌ గువాంగ్‌ శాటిలైట్‌ టెక్నాలజీ సంస్థ సరికొత్త రికార్డును సృష్టించింది. ఈ సంస్థ అంతరిక్షం నుంచి భూమిపైకి లేజర్‌ ట్రాన్స్‌మిషన్‌తో సెకనుకు 100 గిగాబిట్ల(జీబీపీఎస్‌) డాటాను పంపించగలిగినట్టు సౌత్‌ చైనా మార్నింగ్‌ పోస్ట్‌ ఒక కథనాన్ని ప్రచురించింది. చాంగ్‌ గువాంగ్‌ అనేది వాణిజ్య ఉపగ్రహ సంస్థ.

అంతరిక్షంలోని తన జిలిన్‌-1 ఉపగ్రహం నుంచి భూమిపైన ఒక ట్రక్‌లో ఉన్న కేంద్రానికి డాటాను పంపించగలిగింది. ఇంతకుముందు ఈ సంస్థ అందుకున్న వేగం కంటే ఇది దాదాపు 10 రెట్లు అధికం. 100 జీబీపీఎస్‌ వేగం అంటే ఒక సెకనుకు దాదాపు 10 సినిమాలను పంపించడంతో సమానమని ఈ సంస్థ ప్రతినిధి వాంగ్‌ హాంఘాంగ్‌ తెలిపారు. ఈ సాంకేతికతను ఎలాన్‌ మస్క్‌కు చెందిన స్టార్‌లింక్‌ సంస్థ కూడా అభివృద్ధి చేసినట్టు కథనాలు ఉన్నప్పటికీ ఎంత వేగాన్ని అందుకున్నదనే అంశంపై స్పష్టత లేదు. ఇంతకుముందు ఎంఐటీ, నాసా కలిసి లేజర్‌ ట్రాన్స్‌మిషన్‌తో 100 జీబీపీఎస్‌ వేగాన్ని అందుకున్నట్టు ప్రకటించాయి.