Aquanaut and Astronaut : సముద్రం నుంచి అంతరిక్షంలోకి తొలి ఫోన్‌ కాల్

Aquanaut and Astronaut : సముద్రంలో 205 అడుగుల దిగువ నుంచి మొదటిసారిగా ఆక్వానాట్.. స్పేస్ మిషన్‌లో ఉన్న తన వ్యోమగామి స్నేహితుడితో రేడియో టెలిఫోన్‌లో మాట్లాడాడు. ఇది జరిగి నేటికి సరిగ్గా 56 ఏండ్లు...

August 29, 2021 / 12:55 PM IST

Aquanaut and Astronaut : సముద్రం నుంచి అంతరిక్షంలోకి తొలి ఫోన్‌ కాల్

సముద్రంలో 205 అడుగుల దిగువ నుంచి మొదటిసారిగా ఆక్వానాట్.. స్పేస్ మిషన్‌లో ఉన్న తన వ్యోమగామి (Aquanaut and Astronaut) స్నేహితుడితో రేడియో టెలిఫోన్‌లో మాట్లాడాడు. ఇది జరిగి నేటికి సరిగ్గా 56 ఏండ్లు పూర్తికావచ్చాయి. ఈ రోజు కమ్యూనికేషన్‌ చరిత్రలో చిరస్థాయిగా నిలిచిపోనున్నది.

అమెరికా తన జెమిని-5 అంతరిక్ష నౌకను 1965 ఆగస్ట్‌ 21 న ప్రయోగించింది. ఈ నౌకలో గోర్డాన్‌ కూపర్‌, పీట్‌ కాన్రాడ్‌ అంతరిక్షానికి వెళ్లారు. తాము తయారు చేసిన బ్యాటరీ 8 రోజుల పాటు పనిచేస్తుందా లేదా అనేది తెలుసుకోవడానికి నాసా ఈ ప్రయోగాన్ని చేపట్టింది. వారిద్దరూ అంతరిక్షంలో రికార్డులు సృష్టించే పనిలో ఉండగా.. కూపర్‌ స్నేహితుడైన స్కాట్‌ కార్పెంటర్‌ నాసా ప్రయోగంలో భాగంలో ఆక్వానాట్‌గా విధులు నిర్వర్తిస్తున్నాడు. లోతైన సముద్ర డైవింగ్ మానవులపై ఎలాంటి శారీరక, మానసిక ప్రభావాలను చూపిస్తుంది అనేది అధ్యయనం చేయడం అమెరికా నేవీ సీలాబ్‌-II మిషన్‌ చేపట్టింది. ఈ అధ్యయనం చేసేందుకు పసిఫిక్‌ మహా సముద్రంలో 205 అడుగుల కిందికి వెళ్లిన స్కాట్‌.. అక్కడి నుంచి కూపర్‌తో రేడియో టెలిఫోన్‌ ద్వారా మాట్లాడారు. ఇంత లోతు నుంచి అంత ఎత్తుపైకి రేడియో టెలిఫోన్‌ ద్వారా సంభాషించడం ఇదే మొదటిది.

మరుసటి రోజు కూపర్‌, పీట్‌ అంతరిక్షం నుంచి భూమికి తిరిగొచ్చారు. స్కాట్‌ మాత్రం 30 రోజుల పాటు సముద్ర గర్భంలోనే గడిపారు. సముద్రం అడుగున ఎక్కువ కాలం గడిపిన వ్యక్తిగా స్కాట్‌ రికార్డ్‌ సాధించారు.