Afghanistan | మహిళలకు వర్సిటీ విద్యపై నిషేధం.. తరగతులు బహిష్కరించిన పురుష విద్యార్థులు

Afghanistan | అఫ్గానిస్థాన్‌లో అమ్మాయిలకు యూనివర్సిటీ విద్యను నిషేధం విధించడంపై సర్వత్రా నిరసన వ్యక్తమవుతున్నది. అమ్మాయిలకు మద్దతుగా దేశవ్యాప్తంగా పురుష విద్యార్థులు తరగతులు బహిష్కరించారు.

కాబూల్‌: అఫ్గానిస్థాన్‌లో అమ్మాయిలకు యూనివర్సిటీ విద్యను నిషేధం విధించడంపై సర్వత్రా నిరసన వ్యక్తమవుతున్నది. అమ్మాయిలకు మద్దతుగా దేశవ్యాప్తంగా పురుష విద్యార్థులు తరగతులు బహిష్కరించారు. అమ్మాయిలను వర్సిటీల్లోకి అనుమతించే వరకు క్లాసులకు హాజరయ్యేది లేదని స్పష్టం చేశారు. మహిళలకు ఉన్నత విద్యను దూరంచేసేలా తీసుకున్న నిర్ణయాన్ని వెంటనే వెనక్కి తీసుకోవాలని డిమాండ్‌ చేశారు.

మహిళలను తరగతులకు వచ్చేవారకు తమ ఈ నిరసన కొనసాగుతుందని ముజాముల్‌ అనే విద్యార్థి స్పష్టం చేశాడు. అప్పటివరకు తాము చదువుకునేది లేదని చెప్పాడు. తమ సోదరీమణులకు యూనివర్సిటీ విద్యను బంద్‌ చేశారు. అలాగైతే తాము కూడా వర్సిటీలకు వెళ్లేది లేదని తెలిపాడు.

అమ్మాలకు వర్సిటీ విద్యపై తాలిబన్‌ ప్రభుత్వం గతవారం నిషేధం విధించిన విషయం తెలిసిందే. మహిళలకు ఉన్నత విద్యాలయాల్లో ప్రవేశం అక్కర్లేదని విద్యాశాఖ మంత్రి నిదా మహ్మద్ నదిం అన్నారు. యూనివర్సిటీలోకి అనుమతి ఇవ్వడం వల్ల.. ఆడ, మగ ఒకే దగ్గరికి వస్తున్నారని, ఇది ఇస్లాం సూత్రాలకు విరుద్ధంగా ఉండడంతో దీన్ని నిరోధించడానికే ఈ కొత్త ఆదేశాలని ఆయన పేర్కొన్నారు. తదుపరి నోటీసులు వచ్చే వరకు ఇది అమలులో ఉంటుందని ఆయన పేర్కొన్నారు.