ఆయుష్షు పెంచే ఔషధం.. 25 శాతం పెరిగిన ఎలుకల జీవితకాలం

మనుషుల జీవితకాలాన్ని పెంచాలనే లక్ష్యంతో అభివృద్ధి చేసిన ఓ ఔషధం ఇప్పుడు అందరి దృష్టిని ఆకర్షిస్తున్నది.

• వృద్ధాప్యాన్ని నెమ్మదింపజేస్తున్నట్టు గుర్తించిన సైంటిస్టులు

లండన్‌, జూలై 18: మనుషుల జీవితకాలాన్ని పెంచాలనే లక్ష్యంతో అభివృద్ధి చేసిన ఓ ఔషధం ఇప్పుడు అందరి దృష్టిని ఆకర్షిస్తున్నది. ఎలుకలపై విజయవంతమైన ఈ ఔషధ ప్రయోగం మనుషుల ఆయుష్షును కూడా పెంచవచ్చనే ఆశలు చిగురిస్తున్నాయి. లండన్‌లోని ఇంపీరియల్‌ కాలేజీకి చెందిన ఎంఆర్‌సీ ల్యాబొరేటరీ ఆఫ్‌ మెడికల్‌ సైన్స్‌, సింగపూర్‌లోని డ్యూక్‌-ఎన్‌యూఎస్‌ మెడికల్‌ స్కూల్‌కు చెందిన పరిశోధకులు తయారుచేసిన ఈ ఔషధానికి సంబంధించిన వివరాలు ‘నేచర్‌’ జర్నల్‌లో ప్రచురితమయ్యాయి.

25 శాతం పెరిగిన ఎలుకల జీవితకాలం

పరిశోధకులు ఈ ప్రయోగంలో భాగంగా ఇంటర్‌ల్యూకిన్‌-11 అనే ప్రొటీన్‌పై దృష్టి సారించారు. వయసు పెరుగుతున్న కొద్దీ శరీరంలో దీని స్థాయిలు పెరుగుతాయి. వృద్ధాప్యానికి ఇదే ప్రధాన కారణమని పరిశోధకులు గుర్తించారు. ఇంటర్‌ల్యూకిన్‌-11 ఉత్పత్తిని అడ్డుకునేందుకు ఒక ఔషధాన్ని అభివృద్ధి చేశారు. దీనికి 75 వారాల వయసు ఉన్న ఎలుకలపై ప్రయోగించారు. ఇది మనుషులకు 55 ఏండ్ల వయసుతో దాదాపుగా సమానం. ఈ ఔషధాన్ని ప్రయోగించిన ఎలుకల జీవితకాలం 20-25 శాతం పెరిగిందని పరిశోధకులు తెలిపారు.

ఎలుకల కండరాల పనితీరు మెరుగయ్యిందని, సన్నగా, చురుగ్గా మారాయని, వెంట్రుకలు ఎక్కువగా వచ్చాయని గుర్తించినట్టు చెప్పారు. ఎలుకలపై సత్ఫలితాలను ఇచ్చిన ఈ ఔషధాన్ని ప్రస్తుతం మనుషులపై కూడా ప్రయోగిస్తున్నారు. ముందుగా ఊపిరితిత్తుల ఫైబ్రోసిస్‌తో బాధపడుతున్న వారికి ఈ ఔషధం ఇచ్చామని, ఇది మనుషులు తీసుకోవడానికి సురక్షితమే అనేది తాము గుర్తించినట్టు ప్రొఫెసర్‌ స్టువర్ట్‌ కుక్‌ తెలిపారు. అయితే, మనుషులపై ఇది ఎలా పని చేస్తుందనే తేలాల్సి ఉంది.