వాషింగ్టన్: 150 ఏండ్ల నాటి వివాహ ధృవీకరణ పత్రం ఇటీవల వెలుగుచూసింది. ఒక పెయింటింగ్ ఫ్రేమ్ లోపల రహస్యంగా ఉంచిన దీనిని ఒక షాపులోని ఉద్యోగి గుర్తించాడు. దీంతో వందల ఏండ్ల నాటి ఈ మ్యారేజ్ సర్టిఫికెట్ సోషల్ మీడియాలో వైరల్ అయ్యింది. అమెరికా నార్త్ కరోలినాలోని బొలీవియాలో ఒక హోస్ట్ చెస్ట్ స్టోర్ ఉద్యోగి పురాతన పెయింటింగ్ను శుభ్రం చేస్తుండగా ఫ్రేమ్ వెనుక వైపు లోపల ఒక కవర్ ఉన్నట్లు గమనించాడు. 1889లో ముద్రించిన ఆ ఫొటోలో పూలను చేతపట్టిన బాలిక, ఆమె వెనుక కుక్క బొమ్మ ఉన్నది. ఆ ఫొటో ఫ్రేమ్ వెనుక రహస్యంగా ఉంచిన కవర్ను బయటకు తీయగా 150 ఏండ్ల నాటి వివాహ ధృవీకరణ పత్రం బయటపడింది.
ఈ మ్యారేజ్ సర్టిఫికెట్, న్యూజెర్సీలోని బోర్డౌన్ నగరానికి చెందిన విలియం, కేటీ జంటకు చెందినగా గుర్తించారు. 1975 ఏప్రిల్ 11న వారిద్దరు పెండ్లి ప్రమాణం చేసినట్లుగా ఈ వివాహ ధృవీకరణ పత్రంలో ఉన్నది. దీనిని చూసి ఆ షాపును నిర్వహించే ట్రస్ట్ ఎగ్జిక్యూటివ్ డైరెక్టర్ కార్మెన్ స్మిత్ ఎంతో ఉత్కంఠకు లోనయ్యారు. ఈ పురాతన మ్యారేజ్ సర్టిఫికెట్ను నిజమైన వారసత్వ సంపదగా ఆయన అభివర్ణించారు. దీని గురించి తన ఫేస్బుక్ ఖాతాలో పోస్ట్ చేశారు. ఆ జంటకు చెందిన కుటుంబానికి దీనిని అప్పగిస్తానని తెలిపారు.
అయితే, వివాహ ధృవీకరణ పత్రంలో చివరి పేరు సరిగా కనిపించకపోవడంతో వారి పూర్తి పేరు గుర్తించడం కష్టంగా ఉన్నదని స్మిత్ చెప్పారు. ఈ నేపథ్యంలో ఆ జంట కుటుంబాన్ని గుర్తించేందుకు తన పోస్ట్ను చాలా మందికి షేర్ చేసి తనకు సహాయం చేయాలంటూ ఫేస్బుక్ ద్వారా అభ్యర్థించా రు. సంబంధిత కుటుంబీకులను గుర్తించి 150 ఏండ్ల నాటి మ్యారేజ్ సర్టిఫికెట్ను వారికి అందజేయగలమన్న ఆశాభావాన్ని ఆయన వ్యక్తం చేశారు.