రెండు చిన్న విమానాలు ఢీ… నలుగురు మృతి

వాషింగ్టన్‌: రెండు చిన్న విమానాలు ఢీ కొన్నాయి. ఈ ప్రమాదంలో ఆ రెండు విమానాల్లో ప్రయాణిస్తున్న నలుగురు మరణించారు. అమెరికాలోని లాస్‌ వేగాస్‌లో ఈ సంఘటన జరిగింది. ఆదివారం మధ్యాహ్నం ఒకే ఇంజన్ ఉన్న పైపర్ పీఏ-45, సింగిల్ ఇంజిన్ సెస్నా 172 ఢీకొన్నాయని ఫెడరల్ ఏవియేషన్ అడ్మినిస్ట్రేషన్ (ఎఫ్‌ఏఏ) అధికారులు తెలిపారు. పైపర్ పీఏ-45 విమానం లాస్‌ వేగాస్‌ ఎయిర్‌పోర్ట్‌లో ల్యాండ్‌ అవుతుండగా సెస్నా 172 విమానాన్ని ఢీకొన్నది. దీంతో పైపర్ పీఏ-45 విమానం రన్‌వేకు కాస్త దూరంలో కూలిపోయింది. మరోవైపు సెస్నా విమానం సమీపంలోని నీటి కొలనులో పడింది.

కాగా, ఒక్కో విమానంలో ఇద్దరు వ్యక్తులు ఉన్నారని, ఈ ప్రమాదంలో రెండు విమానాల్లోని మొత్తం నలుగురు చనిపోయారని అధికారులు చెప్పారు. అయితే మృతుల పేర్లు, ఏ ప్రాంతానికి చెందిన వారు అన్నది ప్రకటించలేదు. మరోవైపు రెండు చిన్న విమానాలు ఢీ కొన్న ప్రమాదంపై నేషనల్ ట్రాన్స్‌పోర్టేషన్ సేఫ్టీ బోర్డ్ (ఎన్టీఎస్‌బీ), ఫెడరల్ ఏవియేషన్ అడ్మినిస్ట్రేషన్ (ఎఫ్‌ఏఏ) దర్యాప్తు చేపట్టాయి.