Apple iPod : యాపిల్‌ దశ దిశను మార్చిన తొలి ఐపాడ్‌

Today History : ప్రముఖ సంస్థ యాపిల్‌ తన మొట్టమొదటి ఐపాడ్‌ను 20 సంవత్సరాల క్రితం సరిగ్గా ఇదే రోజున ఆవిష్కరించింది. ఈ బుల్లి ఐపాడ్‌.. మొత్తం యాపిల్‌ సంస్థ ..

October 23, 2021 / 01:36 PM IST

Apple iPod : యాపిల్‌ దశ దిశను మార్చిన తొలి ఐపాడ్‌

(Apple iPod) ప్రముఖ సంస్థ యాపిల్‌ తన మొట్టమొదటి ఐపాడ్‌ను 20 సంవత్సరాల క్రితం సరిగ్గా ఇదే రోజున ఆవిష్కరించింది. ఈ బుల్లి ఐపాడ్‌.. మొత్తం యాపిల్‌ సంస్థ దశ, దిశనే మార్చేసిందని చెప్పవచ్చు. మొబైల్ మార్కెట్‌లో యాపిల్‌ ప్రయాణం ఇక్కడి నుంచే ప్రారంభమై.. ప్రస్తుతం ప్రపంచంలోని ప్రముఖ స్మార్ట్‌ఫోన్ తయారీదారుగా ఎదిగింది.

స్టీవ్ జాబ్స్ 1997 లో యాపిల్‌ సీఈఓగా తిరిగి వచ్చారు. డెస్క్‌టాప్ మార్కెట్‌ను మైక్రోసాఫ్ట్ ఆక్రమించింది. ఈ సమయంలో యాపిల్‌కి చెప్పుకోవడానికి ఎటువంటి ఉత్పత్తులు లేవు. అలాగే, దివాలా అంచున ఉన్నది. అటువంటి పరిస్థితిలో ఒక కొత్త పరికరాన్ని తీసుకురావడం ద్వారా మార్కెట్‌ దృష్టికి ఆకర్శించాలని యాపిల్‌ సంస్థ భావించింది. అప్పట్లో హ్యాండ్‌హెల్డ్ ఎంపీ3 ప్లేయర్‌లు మార్కెట్‌లోకి ప్రవేశించాయి. దీని దీటుగా పోర్టబుల్ ఎంపీ3 ప్లేయర్‌ను తయారు చేయాలని స్టీవ్ జాబ్స్ భావించారు. మ్యాక్‌ కంప్యూటర్లను ఉపయోగించే వ్యక్తులను ఆకర్షించడానికి ఐట్యూన్స్‌తో లింక్ చేయాలని ఉద్యోగులు సూచించారు. ఆరు వారాల్లో మూడు ఉత్పత్తి నమూనాలు రూపొందించి ఒకదాన్ని మరింత అధునాతనంగా తయారుచేయడానికి సిద్ధమయ్యారు.

ఈ ఉత్పత్తికి పేరు పెట్టాలని ఫ్రీలాన్స్ రైటర్‌ విన్నీ షికోను కోరగా.. అతడు దీనికి ఐపాడ్ అని పేరు పెట్టాడు. ఈ పేరు స్టార్‌ట్రాక్ నుంచి ప్రేరణగా తీసుకున్నారు. మొదటి ఐపాడ్ నవంబర్ 2001లో పంపిణీ చేశారు. కేవలం ఆరేండ్లలోనే 100 మిలియన్లకు పైగా ఐపాడ్‌లను విక్రయించడాన్ని బట్టి దానికెంత క్రేజ్‌ వచ్చిందో అర్థం చేసుకోవచ్చు. అనంతరకాంలో ఐప్యాడ్‌లు, ఐవాచ్, ఐఫోన్.. సంబంధిత విభాగాల్లో ఆధిపత్యం చలాయిస్తూ వస్తున్నది.