రాంగ్ రూట్‌, ట్రిపుల్ రైడింగ్‌ ఉల్లంఘనలపై రేప‌ట్నుంచే స్పెష‌ల్ డ్రైవ్

Traffic Rules | రాంగ్ రూట్‌ డ్రైవింగ్‌, ట్రిపుల్ రైడింగ్‌ ట్రాఫిక్‌ ఉల్లంఘనలపై సోమ‌వారం నుంచి స్పెషల్‌ డ్రైవ్ మొద‌లు కానుంది. హైదరాబాద్‌ నగరంలో ట్రాఫిక్‌ రద్దీని నియంత్రించేందుకు గ‌త కొద్ది రోజుల క్రితం ట్రాఫిక్‌ పోలీసులు ఆపరేషన్‌ రోప్‌ చేపట్టిన సంగ‌తి

హైద‌రాబాద్ : రాంగ్ రూట్‌ డ్రైవింగ్‌, ట్రిపుల్ రైడింగ్‌ ట్రాఫిక్‌ ఉల్లంఘనలపై సోమ‌వారం నుంచి స్పెషల్‌ డ్రైవ్ మొద‌లు కానుంది. హైదరాబాద్‌ నగరంలో ట్రాఫిక్‌ రద్దీని నియంత్రించేందుకు గ‌త కొద్ది రోజుల క్రితం ట్రాఫిక్‌ పోలీసులు ఆపరేషన్‌ రోప్‌ చేపట్టిన సంగ‌తి తెలిసిందే. ట్రాఫిక్ రూల్స్ పాటించని వాహనదారులకు జరిమానాలు విధిస్తున్న విషయం విదిత‌మే.

ట్రాఫిక్‌ సిగ్నల్స్‌ వద్ద సర్కిల్స్ వద్ద స్టాప్‌ లైన్ దాటితే రూ.100, ఫ్రీ లెఫ్ట్‌ను బ్లాక్‌ చేస్తే రూ.1000, పాదాచారులకు అడ్డు కలిగించేలా వాహనాలు నిలిపితే రూ.600 ఫుట్‌పాత్‌లను ఆక్రమిస్తే భారీ ఫైన్స్ విధిస్తున్న విషయం తెలిసిందే. ట్రాఫిక్‌ పోలీసులు చేపట్టిన ‘ఆపరేషన్‌ రోప్‌’ విజయవంతం కావడంతో.. తాజాగా ట్రాఫిక్‌ నిబంధనలు మరింత కఠినతరం చేయాలని నిర్ణయించారు.

ఇందులో భాగంగా రాంగ్‌ రూట్‌లో డ్రైవింగ్‌ చేస్తే రూ.1700, ట్రిపుల్ రైడింగ్ చేస్తే రూ.1200 ఫైన్ వేయనున్నట్లు ట్రాఫిక్‌ పోలీసులు పేర్కొన్నారు. ఈ నెల 28 నుంచి రాంగ్‌రూట్‌, ట్రిపుల్‌ డ్రైవింగ్‌పై ప్రత్యేక డ్రైవ్‌ నిర్వహించనున్నారు. ట్రాఫిక్‌ పోలీసులెవ్వరూ లేరు కదా అని ఇష్టానుసారంగా వాహనం నడిపినా.. ఎవరూ చూడడం లేదని నిబంధనలకు విరుద్ధంగా సిగ్నల్స్‌ జంప్‌ చేసినా సీసీ కెమెరాల్లో దృశ్యాలను బట్టి.. నిబంధనలు ఉల్లంఘించిన వారికి జరిమానాలు విధిస్తామని ట్రాఫిక్‌ పోలీసులు హెచ్చరించారు. వాహనదారులు తప్పనిసరిగా నిబంధనల మేరకు వాహనాలను నడుపుతూ ట్రాఫిక్‌కు ఇబ్బందులు కలుగకుండా చూడాలని కోరుతున్నారు.