Sewage | జవహర్‌ కాలనీలో రోడ్లపై పారుతున్న మురుగు.. అధికారుల నిర్లక్ష్యంపై స్థానికుల ఆగ్రహం

పండగ వేళ ప్రజలు మురుగు దుర్వాసనతో ఇబ్బందులు పడుతున్నారు.

కొండాపూర్, అక్టోబర్ 23 : పండగ వేళ ప్రజలు మురుగు దుర్వాసనతో ఇబ్బందులు పడుతున్నారు. మియాపూర్ సర్కిల్ చందానగర్‌ డివిజన్ పరిధిలోని జవహర్‌ కాలనీలో మురుగునీరు రోడ్లపై పారుతుం డటంతో స్థానికులు తీవ్ర అసౌకర్యానికి గురవుతున్నారు. రోడ్లపై మురుగునీరు నిలిచి, దుర్వాసన వెదజల్లుతుండటంతో అటుగా రాకపోకలు సాగించేవారు, కాలనీవాసులు తీవ్ర ఇబ్బందులు ఎదుర్కొంటున్నారు.

సమస్యను పరిష్కరించాలని అధికారులకు ఫిర్యాదు చేసినప్పటికీ తగిన చర్యలు తీసుకోవడం లేదంటూ స్థానికులు ఆవేదన వ్యక్తం చేస్తున్నారు. మురుగునీటి సమస్యతో పారిశుధ్యం దెబ్బతినడమే కాకుండా, పరిసరాలు అపరిశుభ్రంగా మారుతున్నాయని, సంబంధిత అధికారులు తక్షణమే స్పందించి మురుగునీటి ప్రవాహానికి అడ్డుకట్ట వేసి, సమస్యకు శాశ్వత పరిష్కారం చూపాలని కోరుతున్నారు.