48 గంటల్లో వర్ష సూచన

పశ్చిమ దిశ నుంచి తెలంగాణ వైపు వీస్తున్న కింది స్థాయి గాలుల ప్రభావంతో గ్రేటర్‌లో ఎండలు దంచికొడుతున్నాయి. పగటి ఉష్ణోగ్రతలు 40 డిగ్రీలు దాటి నమోదవుతున్నాయి.

సిటీబ్యూరో, మే 31 (నమస్తే తెలంగాణ): పశ్చిమ దిశ నుంచి తెలంగాణ వైపు వీస్తున్న కింది స్థాయి గాలుల ప్రభావంతో గ్రేటర్‌లో ఎండలు దంచికొడుతున్నాయి. పగటి ఉష్ణోగ్రతలు 40 డిగ్రీలు దాటి నమోదవుతున్నాయి. రాత్రి ఉష్ణోగ్రతలు సైతం 30 డిగ్రీలకు చేరువకావడంతో నగరవాసులు ఉక్కపోతతో ఉక్కిరిబిక్కిరవుతున్నారు. శుక్రవారం ఉదయం నుంచి రాత్రి వరకు నగరంలో గరిష్ఠం 41.0, కనిష్ఠం 29.7 డిగ్రీలు, గాలిలో తేమ 31 శాతంగా నమోదైనట్లు వాతావరణ కేంద్రం అధికారులు వెల్లడించారు.

రాగల 48 గంటల్లో గ్రేటర్‌లోని పలు చోట్ల ఉరుములు, మెరుపులు, ఈదురు గాలులతో కూడిన తేలికపాటి నుంచి మోస్తరు వానలు కురిసే అవకాశాలున్నట్లు తెలిపారు. అధిక ఉష్ణోగ్రతల కారణంగా క్యుములో నింబస్‌ మేఘాలు ఏర్పడి, సాయంత్రం లేదా రాత్రి వేళలో వానలు కురిసే అవకాశాలు ఉన్నాయని చెప్పారు. ఈ నేపథ్యంలో గ్రేటర్‌కు ఎల్లో అలర్ట్‌ హెచ్చరికలు జారీ చేశారు.