Ramagiri Swarika | చాంద్రాయణగుట్ట, డిసెంబర్ 14: తెలంగాణ జుడీషియల్ సర్వీస్ 2023 సివిల్ జడ్జి జూనియర్ డివిజన్ ఎగ్జామినేషన్లో పాతబస్తీ, అంబికానగర్కు చెందిన రామగిరి శ్రీనివాసాచారి, శ్రీలత దంపతుల కుమార్తె స్వారిక అద్భుతమైన ప్రతిభను కనబర్చి జూనియర్ సివిల్ జడ్జిగా ఎంపికయ్యారు. చిన్ననాటి నుంచి చదువులో రాణించే స్వారిక సోదరుడు చంద్రకాంత్ సహకారంతో సూక్ష్మ కళా ఖండాలు గీయడంలో తెలంగాణలోనే ఘన కీర్తిని ఆర్జించారు.
ఎన్నో అవార్డులను సొంతం చేసుకున్న ఆమె గవర్నర్ నుంచి ప్రత్యేకంగా అవార్డును అందుకోవడంతో పాటు ప్రశంసలు పొందారు. చదువులో ఎంబీఏ, ఎల్ఎల్బీ పూర్తి చేసిన స్వారిక రెండేళ్లుగా తెలంగాణ జ్యుడీషియల్ సర్వీస్ ఎగ్జామినేషన్ కోసం కష్ట పడ్డారు. ఆగస్టులో నిర్వహించిన ప్రిలిమినరీ, అక్టోబర్లో నిర్వహించిన మెయిన్ ఎగ్జామ్స్లో అర్హత మార్కులు సాధించింది. డిసెంబర్లో హైకోర్టు న్యాయమూర్తుల అధ్యక్షతన నిర్వహించిన ఇంటర్వ్యూలో న్యాయమూర్తులు అడిగిన ప్రశ్నలకు సరైన సమాధానం చెప్పి ఈ నెల 8న జూనియర్ జడ్జీగా ఎంపికయ్యారు. తెలంగాణ సివిల్ జడ్జికి సంబంధించి కేవలం 8 పోస్టులు మాత్రమే ఉన్నప్పటికి స్వారిక రాణించి జడ్జిగా ఎంపిక కావడం విశేషం.