సిటీబ్యూరో, సెప్టెంబర్ 30 (నమస్తే తెలంగాణ) : దేశంలోనే మొట్ట మొదటి సారిగా ప్రపంచ స్థాయి ప్రమాణాలతో పర్యావరణ హితంగా నిర్మించిన సోలార్ రూప్ టాప్ సైకిల్ ట్రాక్ను అక్టోబర్ 1న (నేడు) ప్రారంభించనున్నారు. గ్రేటర్ చుట్టూ 158 కి.మీ మేర నిర్మించిన ఔటర్ రింగు రోడ్డు లోపలి వైపు సుమారు 23 కి.మీ దూరంతో ఎంతో ప్రతిష్టాత్మక ప్రాజెక్టుగా హైదరాబాద్ మెట్రోపాలిటన్ డెవలప్మెంట్ అథారిటీ చేపట్టింది. నిర్మాణ పనులన్నీ పూర్తి కావడంతో ఆదివారం సాయంత్రం 6గంటలకు రాష్ట్ర ఐటీ, పరిశ్రమలు, పురపాలక శాఖ మంత్రి కల్వకుంట్ల తారక రామారావు సోలార్ రూప్ టాప్ సైకిల్ ట్రాక్ను ప్రారంభించనున్నారు. ఐటీ కారిడార్లోని నానక్రాంగూడ నుంచి నార్సింగి, మంచిరేవుల మీదుగా తెలంగాణ పోలీస్ అకాడమీ వరకు, నార్సింగి నుంచి కోకాపేట, వట్టినాగులపల్లి మీదుగా కొల్లూరు వరకు మొత్తం 23 కి.మీ దూరం సోలార్ రూప్ టాప్ సైకిల్ ట్రాక్ను నిర్మించారు. ఈ సైకిల్ ట్రాక్పై సుమారు 16 మెగావాట్ల స్థాపిత సామర్థ్యంతో సోలార్ పవర్ విద్యుత్ను ఉత్పత్తి చేసేలా దీన్ని డిజైన్ చేసి ఏర్పాటు చేశారు.