Hyderabad | హైదరాబాద్‌లో లగ్జరీ కార్లపై పెరుగుతున్న మోజు.. కొత్త మోడల్‌ వస్తే చాలు ఆరా తీసేస్తున్నారు!

Hyderabad | లగ్జరీ కార్ల వినియోగంలోనూ విశ్వనగరం దూసుకెళ్తున్నది. ప్రపంచ నగరాల కంపెనీలు హైదరాబాద్‌కు తరలిరావడం.. ఇక్కడే తమ బ్రాంచీలను ఏర్పాటు చేయడం ఓ ఎత్తయితే అదే స్థాయిలో అన్ని రంగాలకు చెందిన వారు నగరంలో స్థిరపడటానికి ఆసక్తి చూపుతున్నారు. సినీ, రాజకీయ, వ్యాపార, నిర్మాణ రంగాలకు చెందిన ప్రముఖులు లగ్జరీ కార్ల వినియోగంలో ముందుంటున్నారు.

Hyderabad | సిటీబ్యూరో, సెప్టెంబర్‌ 20 ( నమస్తే తెలంగాణ): లగ్జరీ కార్ల వినియోగంలోనూ విశ్వనగరం దూసుకెళ్తున్నది. ప్రపంచ నగరాల కంపెనీలు హైదరాబాద్‌కు తరలిరావడం.. ఇక్కడే తమ బ్రాంచీలను ఏర్పాటు చేయడం ఓ ఎత్తయితే అదే స్థాయిలో అన్ని రంగాలకు చెందిన వారు నగరంలో స్థిరపడటానికి ఆసక్తి చూపుతున్నారు. సినీ, రాజకీయ, వ్యాపార, నిర్మాణ రంగాలకు చెందిన ప్రముఖులు లగ్జరీ కార్ల వినియోగంలో ముందుంటున్నారు. అందుకే లగ్జరీ కార్లకు హైదరాబాద్‌ కేరాఫ్‌ అడ్రస్‌గా మారింది. అత్యాధునిక మోడల్‌ ఏదొచ్చినా కొనుగోలు చేయడానికి వాహన ప్రియులు సిద్ధంగా ఉంటున్నారు. ఏ కంపెనీ? ఏ సిరీస్‌? ఖరీదు ఎంత? భద్రత చర్యలు ఏమిటీ? ఇలా అనేక కోణాల్లో వాహనదారులు ఆరా తీస్తున్నారు. నచ్చితే కోట్ల రూపాయలు విలువజేసే కారైనా ఇట్టే కొనేస్తున్నారు. వ్యాపార వాణిజ్య, సినీ, రాజకీయ దిగ్గజాలకు కేంద్రమైన నగరంలో ఏటా ఈ తరహా విలాసవంతమైన వాహనాల అమ్మకాలు భారీగా పెరుగుతున్నాయి. కనీసం రూ.20లక్షలు మొదలు కొని రూ.7 కోట్లపై విలువైన కార్లు అమ్ముడుపోతున్నాయి. రూ.20 లక్షలు ఆ పై విలువైన కార్లు గతేడాది 17,111 వరకు అమ్ముడు పోగా.. ఈ ఏడాది ప్రస్తుతం (సెప్టెంబర్‌ 14) వరకు ఆ సంఖ్య 9,217 దాటేసింది. ఇంకా రానున్న పండుగలతో వాటి సంఖ్య 30వేలు దాటుతుందని రవాణా శాఖ అధికారులు పేర్కొంటున్నారు.

లైఫ్‌ టాక్స్‌తో భారీ ఆదాయం..!!

ఖరీదైన వాహనాలతో వచ్చే లైఫ్‌ టాక్స్‌తోనూ రవాణా శాఖకు భారీ స్థాయిలో ఆదాయం సమకూరుతోంది. 20 లక్షలు ఆపై విలువజేసే కార్లు 18 శాతం లైఫ్‌ టాక్స్‌ చెల్లించాల్సి ఉంటుంది. గతేడాది ఆర్థిక సంవత్సరానికి గాను లైఫ్‌ టాక్స్‌ రూ.1740 కోట్లు వచ్చింది. ఈ ఏడాది ఆగస్టు 31 వరకు రూ.1991.49 కోట్లు దాటింది. ఇందులో ఎక్కువ శాతం హైదరాబాద్‌ నుంచి వచ్చిందే. మూవీ, బిజినెస్‌, పొలిటికల్‌ రంగాల ప్రముఖులు ఇతరులకు భిన్నంగా ఉండాలనే కాన్సెప్ట్‌, అందులో ఉండే భద్రత పరమైన అంశాలతో ఎక్కువగా ఖరీదైన కార్లను కొనేందుకు ఆసక్తి చూపుతున్నారు. అంతేకాదు రియల్‌ఎస్టేట్‌, ఇతర కంపెనీల పేరు పై కూడా ఖరీదైన వాహనాలను కొనుగోలు చేస్తున్నారు. గత ఏడాది ప్రముఖ బిజినెస్‌ మ్యాన్‌ కుమారుడు నజీర్‌ఖాన్‌ అనే వ్యక్తి రూ.7 కోట్లపై విలువజేసే ఎంసీల్యారెన్‌ 765 ఎల్‌టీ స్పైడర్‌ వాహనం కొనుగోలు చేశాడు. అంటే ఈ వాహనం విలువ ఆధారంగా లైఫ్‌టాక్స్‌ 1.26 కోట్లు చెల్లించాడు. ఇలానే హీరో మెగాస్టార్‌ చిరంజీవి టొయోటా వెల్‌ఫైర్‌ లైఫ్‌ టాక్స్‌తో 1.9కోట్ల రూపాయల విలువజేసే వాహనం కొనుగోలు చేశాడు. ఇటీవల అల్లరి నరేశ్‌ రూ.65లక్షల విలువజేసే కియాఈవీ6 వాహనం కొనుగోలు చేశాడు. దానిపై లైఫ్‌ టాక్స్‌ 11.70లక్షలు చెల్లించాడు.

లగ్జరీ కార్లకు ఆదరణ పెరిగింది..

విలాసవంతమైన కార్లకు డిమాండ్‌ పెరిగింది. చాలా మంది డబ్బులు ఎంతైనా వెచ్చించి నచ్చిన కార్లను కొనుగోలు చేస్తున్నారు. ముఖ్యంగా కంపెనీలు తమ వాహనాల్లో భద్రత పరమైన ఫీచర్లను విభిన్న రకాలుగా అందుబాటులోకి తీసుకొస్తున్నాయి. ప్రమాదం జరిగినా తప్పించుకునే రక్షణ కల్పించే భద్రత వ్యవస్థ ఉన్న వాహనాలకు ఎన్ని కోట్లు అయినా వెచ్చిస్తున్నారు.

– పి. రవీందర్‌ కుమార్‌, ఆర్టీఓ, ఉప్పల్‌