మెట్రో -ఆర్టీసీ కామన్‌ పాస్‌ రూ.4 వేలకే!

ఆర్టీసీ-మెట్రో కామన్‌పాస్‌ ధరపై ప్రయాణికుల ఆగ్రహంతో రవాణాశాఖ దిగొచ్చింది. రూ.8,500 ఉన్న నెలవారీ కామన్‌పాస్‌ ధరను రూ.4 వేలకు తగ్గించినట్టు మంత్రి పొన్నం ప్రభాకర్‌ శుక్రవారం ప్రకటించారు.

హైదరాబాద్‌, నవంబర్‌ 6 (నమస్తే తెలంగాణ): ఆర్టీసీ-మెట్రో కామన్‌పాస్‌ ధరపై ప్రయాణికుల ఆగ్రహంతో రవాణాశాఖ దిగొచ్చింది. రూ.8,500 ఉన్న నెలవారీ కామన్‌పాస్‌ ధరను రూ.4 వేలకు తగ్గించినట్టు మంత్రి పొన్నం ప్రభాకర్‌ శుక్రవారం ప్రకటించారు. ఈ మేరకు ఆయన వీడియో ద్వారా తన సందేశాన్ని పంపారు. సీఎం రేవంత్‌రెడ్డి, డిప్యూటీ సీఎం భట్టి విక్రమార ఆదేశాలతో మెట్రో-ఆర్టీసీ ఉమ్మడి ప్రయాణ పాస్‌ ధరలు భారీగా తగ్గించామని చెప్పారు. ప్రస్తుతం రూ.400 ఉన్న రోజువారి ఉమ్మడి ప్రయాణ పాస్‌ ధరను రూ.275కు తగ్గించామని, ఇందులో రూ.200 మెట్రో ప్రయాణానికి, రూ.75 ఆర్టీసీకి కేటాయించినట్టు వివరించారు.

ఈ పాస్‌ ద్వారా రోజుకు 4 సింగిల్‌ జర్నీలకు అనుమతి ఉంటుందని తెలిపారు. ప్రస్తుతం రూ.8,500 ఉన్న నెలవారీ ఉమ్మడి ప్రయాణ పాస్‌ ధరను రూ.4,000కు తగ్గించినట్టు చెప్పారు. రూ.3,000 మెట్రో ప్రయాణానికి, రూ.1,000 ఆర్టీసీ ప్రయాణానికి కేటాయించినట్టు పేరొన్నారు. ఈ పాస్‌ ద్వారా నెలలో గరిష్ఠంగా 50 సింగిల్‌ ట్రిప్పులకు అనుమతి ఉంటుందన్నారు. ఆర్టీసీ బస్సులో ప్రయాణానికి పరిమితులు లేవని తెలిపారు. ప్రభుత్వం ప్రకటించిన తగ్గింపు ధరలు నవంబర్‌ 8వ తేదీ నుంచి అమల్లోకి వస్తాయని మంత్రి పొన్నం ప్రభాకర్‌ చెప్పారు.