Visit:
Heavy Rain | హైద‌రాబాద్ : రాష్ట్ర రాజ‌ధాని హైద‌రాబాద్ న‌గ‌రంలో భ‌యంక‌ర‌మైన వ‌ర్షం కురిసింది. ఆదివారం రాత్రి కురిసిన కుండ‌పోత వ‌ర్షానికి న‌గ‌రం అత‌లాకుత‌ల‌మైంది. న‌గ‌రంలోని ప‌లు ప్రాంతాలు జ‌ల‌మ‌యం అయ్యాయి. రోడ్లు చెరువుల‌ను త‌ల‌పిస్తున్నాయి. దీంతో ఎక్క‌డి వాహ‌నాలు అక్క‌డే ఆగిపోయాయి. ప‌లు చోట్ల భారీగా ట్రాఫిక్‌జామ్ ఏర్ప‌డింది.
షేక్‌పేట, మ‌ణికొండ, నార్సింగి, గ‌చ్చిబౌలి, నాన‌క్‌రామ్‌గూడ, రాయ్‌దుర్గ్, టోలీచౌకీ, మెహిదీప‌ట్నం, ఖైర‌తాబాద్‌, జూబ్లీహిల్స్, శేరిలింగంప‌ల్లి, నాంప‌ల్లి, అబిడ్స్, గోషామ‌హ‌ల్‌, కూక‌ట్‌ప‌ల్లి, అమీర్‌పేట్, స‌న‌త్‌న‌గ‌ర్‌, మాదాపూర్, హైటెక్‌సిటీ, బేగంపేట్, సికింద్రాబాద్, తార్నాక, రాంన‌గ‌ర్‌, నాచారం, అంబ‌ర్‌పేట్‌, దిల్‌సుఖ్‌న‌గ‌ర్‌, ఎల్‌బీన‌గ‌ర్, హ‌య‌త్‌న‌గ‌ర్, సంతోష్ న‌గ‌ర్, చార్మినార్, ఉప్పుగూడ, జియ‌గూడ‌తో పాటు త‌దిత‌ర ప్రాంతాల్లో వాన దంచికొట్టింది.
రాత్రి 8 గంట‌ల వ‌ర‌కు అందించిన స‌మాచారం మేర‌కు మల్కాజిగిరి ఈస్ట్ ఆనంద్ బాగ్‌లో 5.53 సె.మీ, నేరెడ్‌మెట్‌లో 5, బండ్ల‌గూడ‌లో 4.75, మ‌ల్లాపూర్‌లో 4.2, నాచారంలో 4.13, ఉప్ప‌ల్ చిలుకాన‌గ‌ర్‌లో 3.85 సె.మీ. వ‌ర్ష‌పాతం న‌మోదైంది.
