Visit:
హైదరాబాద్‌: ఆకాశానికి చిల్లులు పడినట్లుగా హైదరాబాద్‌లో (Hyderabad) వర్షం దంచికొట్టింది. కుండపోతగా కురిసిన వానతో రోడ్లపై ఎక్కడచూసినా నీరు నిలిచిపోయింది. నగరంలో అత్యధికంగా కుత్బుల్లాపూర్‌లో అత్యధికంగా 15 సెంటీమీటర్ల వర్షపాతం నమోదయింది. ఇక శేరిలింగంపల్లిలో 14 సెం.మీ., సరూర్‌నగర్‌లో 12.8 సెం.మీ., ఖైరతాబాద్‌లో 12.6 సెం.మీ., ఉప్పల్‌, జూబ్లీహిల్స్‌, ఎల్బీనగర్‌ ప్రాంతాల్లో 11 సెం.మీ., బండ్లగూడ, హయత్‌నగర్‌, షేక్‌పేటలో 10 సెం.మీ., గోల్కొండలో 9.7 సెం.మీ., బాలానగర్‌లో 9.2 సెం.మీ. చొప్పున వర్షంపాతం నమోదయింది. ఈ నేపథ్యంలో అధికారులను జీహెచ్‌ఎంసీ పరిధిలోని జిల్లాల కలెక్టర్లు అప్రమత్తం చేశారు. అధికారులంతా అందుబాటులో ఉండాలని, సమన్వయం పనిచేయాలని ఆదేశించారు. ఆయా కలెక్టరేట్లలో కంట్రోల్‌ రూమ్‌లను ఏర్పాటు చేశారు. వరద సహాయక చర్యల కోసం నంబర్లను కేటాయించారు.
మరోవైపు రాష్ట్రంలోని పలు జిల్లాల్లో కూడా భారీ వర్షం కురిసింది. యాదాద్రి జిల్లా ఆత్మకూరులో అత్యధికంగా 15 సెంటీమీటర్లు,నల్లగొండ జిల్లాలోని శాలిగౌరారంలో 14 సెం.మీ. వర్షపాతం నిమోదయింది. కాగా, భారీ వర్షాల నేపథ్యంలో ప్రజలంతా అప్రమత్తంగా ఉండాలని ముఖ్యమంత్రి రేవంత్‌ రెడ్డి సూచించారు. జీహెచ్‌ఎంసీ, హ్రైడ్రా, పోలీసు విభాగాల సమన్వయంతో పనిచేయాలన్నారు.
హైదరాబాద్‌- 040 230 2813/74166 87878
ఎన్డీఆర్‌ఎఫ్‌- 83330 68536
కమాండ్‌ కంట్రోల్‌ సెంటర్‌ (ఐసీసీసీ)- 87125 96106
హైడ్రా- 91541 70992
హైదరాబాద్‌ ట్రాఫిక్‌ పోలీసులు- 87126 60600
సైబరాబాద్‌ కమిషరేట్‌- 85004 11111
రాచకొండ కమిషనరేట్‌- 87126 62999
టీజీఎస్‌పీడీసీఎల్‌- 79015 30966
జీహెచ్‌ఎంసీ- 81259 71221
జలమండలి- 99499 30003
