ఫార్ములా ఈ రేసింగ్‌

భాగ్యనగరం వేదికగా ఈనెల 11వ తేదీన ప్రతిష్టాత్మకంగా నిర్వహించే ఫార్ములా ఈ రేసింగ్‌ కోసం ఏర్పాట్లు వేగంగా జరుగుతున్నాయి. ట్రాఫిక్‌ పరంగా ఎలాంటి ఇబ్బందులు రాకుండా పోలీసులు పకడ్బందీ చర్యలు

• 5 నుంచి 12 వరకు ట్రాఫిక్‌ మళ్లింపు.. రూట్‌ మ్యాప్‌ విడుదల

సిటీబ్యూరో, ఫిబ్రవరి 2 (నమస్తే తెలంగాణ) : భాగ్యనగరం వేదికగా ఈనెల 11వ తేదీన ప్రతిష్టాత్మకంగా నిర్వహించే ఫార్ములా ఈ రేసింగ్‌ కోసం ఏర్పాట్లు వేగంగా జరుగుతున్నాయి. ట్రాఫిక్‌ పరంగా ఎలాంటి ఇబ్బందులు రాకుండా పోలీసులు పకడ్బందీ చర్యలు తీసుకుంటున్నారు. ఈ నేపథ్యంలో 2.8 కి.మీ. పరిధిలోని ఎన్టీఆర్‌ మార్గ్‌లో ఈనెల 5, 6 తేదీల్లో తాత్కాలికంగా, 7 నుంచి 12 వరకు పూర్తిగా ట్రాఫిక్‌ను మళ్లిస్తున్నారు. దీంతో ప్రజలు ప్రత్యామ్నాయ మార్గాల్లో వెళ్లాలని ట్రాఫిక్‌ పోలీసులు సూచిస్తున్నారు. మళ్లింపుల కారణంగా ఖైరతాబాద్‌ జంక్షన్‌, ఓల్డ్‌ సైఫాబాద్‌ పీఎస్‌ జంక్షన్‌, రవీంద్రభారతి, మింట్‌ కాంపౌండ్‌ రోడ్‌, తెలుగుతల్లి జంక్షన్‌, నెక్లెస్‌ రోటరీ చౌరస్తా, కట్టమైసమ్మ, ట్యాంక్‌బండ్‌ వద్ద వాహనాల రద్దీ ఎక్కువగా ఉంటుందని, వాహనదారులు గమనించాలని కోరారు.

• ఖైరతాబాద్‌ చౌరస్తాలోని విశ్వేశ్వరయ్య విగ్రహం వద్ద నుంచి ఫ్లై ఓవర్‌ మీదుగా వెళ్లే వాహనాలను అనుమతించరు. దానిని పూర్తిగా మూసివేసి షాదన్‌ కళాశాల, రవీంద్రభారతి మీదుగా మళ్లిస్తారు.
• బుద్ధ భవన్‌ జంక్షన్‌ మీదుగా నెక్లెస్‌ రోడ్‌ రోటరీ చౌరస్తాకు వచ్చే రహదారి మూసివేసి, వాహనాలను ట్యాంక్‌బండ్‌, రాణిగంజ్‌ వైపు మళ్లిస్తారు.
• ఇక్బాల్‌ మీనార్‌ నుంచి తెలుగుతల్లి ఫ్లై ఓవర్‌ వైపు వచ్చే వాహనాలను లోయర్‌ ట్యాంక్‌బండ్‌ కట్టమైసమ్మ వైపు మళ్లిస్తారు.
• బీఆర్‌కే భవన్‌ నుంచి నెక్లెస్‌రోడ్‌ రోటరీ వైపు వచ్చే వాహనాలను తెలుగుతల్లి జంక్షన్‌ మీదుగా రవీంద్రభారతి వైపు మళ్లిస్తారు.
• ఇక్బాల్‌ మీనార్‌ నుంచి మింట్‌ కాంపౌండ్‌ వైపు వచ్చే వాహనాలు రవీంద్రభారతి వైపు మళ్లిస్తారు.
• ఖైరతాబాద్‌ బడా గణేశ్‌ నుంచి ప్రభుత్వ పాఠ్యపుస్తక ముద్రణాలయం వైపు వచ్చే వాహనాలను సెన్షేషన్‌ థియేటర్‌ రోడ్డు నుంచి రాజ్‌దూత్‌ లేన్‌ మీదుగా మళ్లిస్తారు.
• ఎన్టీఆర్‌ గార్డెన్‌, ఘాట్‌, లుంబినీ పార్కు రహదారులను పూర్తిగా మూసివేస్తారు.