Food Delivery Apps | హైదరాబాద్ : హైదరాబాద్ నగరమంతా ఎడతెరిపి లేకుండా వర్షాలు కురుస్తున్నాయి. దీంతో ఇండ్లకే పరిమితమైన చాలా మంది.. ఆహారాన్ని ఆన్లైన్లో ఆర్డర్ చేసుకుంటున్నారు. కానీ ఫుడ్ డెలివరీ యాప్స్ మాత్రం కస్టమర్ల ఆర్డర్లను నిరాకరిస్తున్నాయి.
ఎందుకంటే.. భారీ వర్షాల నేపథ్యంలో ఫుడ్ డెలివరీ బాయ్స్ తీవ్ర ఇబ్బందులు ఎదుర్కొంటున్నారు. పలు కాలనీలు జలమయం కావడం, రోడ్లపై వరద నీరు నిలిపోవడంతో పాటు పలు ప్రాంతాల్లో భారీగా ట్రాఫిక్ జామ్ కావడంతో.. డెలివరీ బాయ్స్ అవస్థలు పడుతున్నారు. మొత్తానికి ఫుడ్ డెలివరీ బాయ్స్ అందుబాటులో లేకపోవడంతో.. కస్టమర్ల ఆర్డర్లను నిరాకరిస్తున్నాయి ఫుడ్ డెలివరీ యాప్స్. ఒక వేళ బుక్ అయినప్పటికీ.. వాటిని డెలివరీ చేసేందుకు చాలా సమయం పడుతోంది.
ఈ సందర్భంగా స్విగ్గీ డెలివరీ బాయ్ సమీర్ కృష్ణ మాట్లాడుతూ.. భారీ వర్షంలో ఫుడ్ డెలివరీ చేయడం కష్టంగా మారిందన్నాడు. రోడ్లపై నీరు నిలిచిపోవడంతో.. వాహనాలు నెమ్మదిగా కదులుతున్నాయని పేర్కొన్నారు. నెట్వర్క్లో కూడా సమస్యలు ఏర్పడటంతో.. ఫుడ్ డెలివరీకి ఇబ్బందిగా మారిందని తెలిపాడు.
జొమాటో కూడా ఆర్డర్లను అంగీకరించడం లేదు. ప్రస్తుతం తాము ఫుడ్ ఆర్డర్లను అంగీకరించడం లేదు.. త్వరలోనే తిరిగి వస్తామంటూ జొమాటో తమ కస్టమర్లకు సందేశాన్ని పంపుతోంది.