సుల్తాన్బజార్, ఆగస్టు 25: ఉస్మానియా దవాఖానలో రోగులను తప్పుదోవ పట్టిస్తున్న నకిలీ వైద్యుడిని పోలీసులు అరెస్ట్ చేశారు. అఫ్జల్గంజ్ ఎస్ఐ బాలస్వామి తెలిపిన వివరాల ప్రకారం.. చాంద్రాయణగుట్ట బండ్లగూడకు చెందిన మార్వాన్ బిన్ అబ్దుల్ అజీజ్ (27) అనే వ్యక్తి వైద్యుడిగా అవతారమెత్తి..మంగళవారం రాత్రి 9 గంటల సమయంలో దవాఖానలోని క్యాజువాల్టీ వద్ద రోగులకు వైద్య సేవలు అందిస్తూ..తప్పుడు సమాచారం అందిస్తున్నాడు. అక్కడే ఉన్న సీఎంవో డాక్టర్ ప్రణీత గమనించి ..సీఏఎస్ ఆర్ఎంవో డాక్టర్ ఎంఏ మోహిసిద్ధిఖీకు సమాచారం అందించారు. అక్కడికి చేరుకున్న ఆయన.. అబ్దుల్ అజీజ్ను వివరాలు అడిగారు. అతను వైద్యుడు కాదని నిర్ధారించుకొని అఫ్జల్గంజ్ పోలీసులకు ఫిర్యాదు చేశారు. కేసు నమోదు చేసిన పోలీసులు నిందితుడిని అరెస్టు చేసి దర్యాప్తు చేపట్టారు.