RRR | రీజినల్‌ రింగ్‌ రోడ్‌ ఉత్తర భాగానికి కేంద్రం బ్రేక్‌.. ప్రస్తుత అలైన్‌మెంట్‌తో ప్రాజెక్టుకు ఆమోదం కష్టమే!

RRR | తెలంగాణ ప్రభుత్వం ప్రతిష్ఠాత్మకంగా భావిస్తున్న రీజినల్‌ రింగ్‌ రోడ్‌ (ఆర్ఆర్ఆర్‌) ఉత్తర భాగం నిర్మాణానికి కేంద్ర ప్రభుత్వం నుంచి అనుమతులు లభించకపోవడం చర్చనీయాంశంగా మారింది.

RRR | తెలంగాణ ప్రభుత్వం ప్రతిష్ఠాత్మకంగా భావిస్తున్న రీజినల్‌ రింగ్‌ రోడ్‌ (ఆర్ఆర్ఆర్‌) ఉత్తర భాగం నిర్మాణానికి కేంద్ర ప్రభుత్వం నుంచి అనుమతులు లభించకపోవడం చర్చనీయాంశంగా మారింది. ప్రాజెక్టు కోసం రాష్ట్ర ప్రభుత్వం మూడు సార్లు టెండర్లు పిలిచినా కేంద్రం ఆమోదం తెలపలేదు. అలైన్‌మెంట్‌ ఖరారయ్యే సమయంలో భారీగా భూముల కొనుగోళ్లు జరిగాయంటూ ఫిర్యాదులు రావడంతోనే ప్రాజెక్టుపై ముందుకు వెళ్లడం లేదని కేంద్రం వెల్లడించినట్లు సమాచారం.

ఆర్ఆర్ఆర్‌ ఉత్తర భాగం నిర్మాణం కోసం రాష్ట్ర ప్రభుత్వం 2024 డిసెంబర్‌లో తొలిసారి, 2025 నవంబర్‌లో రెండోసారి, 2026 మేలో మూడోసారి టెండర్లు పిలిచింది. అయితే, ఈ ప్రక్రియకు కేంద్ర ప్రభుత్వం నుంచి అవసరమైన ఆమోదం లభించకపోవడంతో నిర్మాణ పనులు ముందుకు సాగడం లేదు. ప్రాజెక్టుకు సంబంధించి 90 శాతం భూసేకరణ పూర్తయిందని రాష్ట్ర ప్రభుత్వం చెబుతున్నప్పటికీ, కేంద్రం నుంచి అనుమతులు రాకపోవడం సమస్యగా మారింది.

ప్రాజెక్టు అలైన్‌మెంట్‌ ఖరారైన సమయంలో కొందరు భారీగా భూములు కొనుగోలు చేశారంటూ ఫిర్యాదులు అందినట్లు కేంద్రం తెలిపినట్లు సమాచారం. ఈ అంశాన్ని పరిగణనలోకి తీసుకున్న కేంద్ర రోడ్డు రవాణా శాఖ ప్రాజెక్టును కేంద్ర మంత్రివర్గం ఆమోదానికి పంపకుండా నిలిపివేసినట్లు తెలుస్తోంది. దీంతో రాష్ట్ర ప్రభుత్వం టెండర్ల ప్రక్రియను కొనసాగించినప్పటికీ, తుది అనుమతుల విషయంలో ప్రతిష్ఠంభన ఏర్పడింది.

ప్రాజెక్టుకు ఆమోదం ఎందుకు లభించడం లేదనే విషయాన్ని తెలుసుకునేందుకు రాష్ట్రం నుంచి అధికారుల బృందం కేంద్రాన్ని సంప్రదించినట్లు సమాచారం. ఈ సందర్భంగా అలైన్‌మెంట్‌ సమయంలో భారీగా భూముల కొనుగోళ్లు జరిగాయంటూ ఫిర్యాదులు వచ్చాయని, అందువల్ల ప్రస్తుత ప్రతిపాదనపై ముందుకు వెళ్లేందుకు సుముఖంగా లేమని కేంద్ర మంత్రిత్వ శాఖ స్పష్టం చేసినట్లు తెలుస్తోంది.

భూసేకరణలో ఎక్కువ భాగం పూర్తయిందని రాష్ట్ర ప్రభుత్వం చెబుతున్నప్పటికీ, అలైన్‌మెంట్‌ చుట్టూ తలెత్తిన ఆరోపణలు ప్రాజెక్టుకు అడ్డంకిగా మారుతున్నాయి. ఈ పరిస్థితుల్లో ప్రస్తుత అలైన్‌మెంట్‌తోనే ఆర్ఆర్ఆర్‌ ఉత్తర భాగానికి కేంద్రం ఆమోదం లభించడం కష్టమని నిపుణులు అభిప్రాయపడుతున్నట్లు సమాచారం. కేంద్రం తన వైఖరిని మార్చుకుంటుందా? లేక అలైన్‌మెంట్‌లో మార్పులు చేయాల్సి వస్తుందా? అన్నది వేచి చూడాల్సి ఉంది.