అతను ఒకసారి శ్రీకాళహస్తి వెళ్లాడు. అక్కడ పెద్దమనిషి వివిధ రకాల చెక్క దువ్వెన్లు అమ్ముతూ కనిపించాడు. అప్పుడు వాటిని కొనాలనుకున్నా..వాయిదా వేశాడు. చాన్నాళ్ల తర్వాత తిరిగి అక్కడికి వెళ్లినపుడు చెక్కదువ్వెనలు కనిపించలేదు. అపుడే అతని మదిలో ఓ ఆలోచన వచ్చింది.ఇలాంటి వస్తువులను పరిరక్షించాలని సంకల్పించుకున్నాడు. అతని పేరు రమేశ్రామనాథన్. 34 ఏండ్లుగా ప్రాచీన, అమూల్యమైన వస్తువులను సేకరిస్తున్నాడు.
సిటీబ్యూరో, ఏప్రిల్ 16 (నమస్తే తెలంగాణ) : బేగంపేట పరిధి కుందన్బాగ్లో ఉండే రమేశ్ నిర్వహించే లీలా (ఆర్ఎస్) క్రాఫ్ట్స్.. పురాతన హస్తకళా వస్తువులు, విలువైన ఆధ్యాత్మిక సంపదకు కేంద్రంగా నిలుస్తున్నది. ఇందులో బెల్ మెటల్ (కంచు), కలంకారి, ఇక్కత్ వస్ర్తాలు, బనానా ఫైబర్, ఫైన్యాపిల్ ఫైబర్, జ్యూట్ వస్తువులు, పట్టుచీర, చేర్యాల బొమ్మలు, తాళపత్ర గ్రంథాలు ఉన్నాయి. గుహల్లో పెయింటింగ్కు వినియోగించిన 2500 ఏండ్ల నాటి రంగురాళ్లు, ఒడిస్సాలోని పూరీ ప్రాంతం నుంచి 350 ఏండ్ల నాటి రాతప్రతులు ఆయన సేకరించారు.
సంపూర్ణ రామాయణ గాథలను చిత్రించిన క్లాత్ కూడా ఉన్నట్లు చెప్పాడు. ఇవే కాకుండా తెలంగాణ ప్రాంతంలో దొరికే గిద్ద, సోల, తవ్వ, కుంచం లాంటి వస్తువులు సేకరించామని పేర్కొన్నారు. పంచలోహాల బొమ్మలు, ఇండోర్ కాగితం గుజ్జుతో చేసిన బొమ్మలు అందరినీ ఆకట్టుకుంటున్నాయి. శాగంతో తయారు చేసిన తాడు, 1970 దశకంలో కమలాదేవి చటోపాధ్యాయ లాంటి వారు రాసిల్క్తో తయారు చేసిన దుప్పట ఇక్కడ ఉంది. కళాపోషణ కోసం నాలుగు తరాల క్రితం ఉపయోగించిన హార్మోనియం ఎంతో అద్భుతంగా ఉన్నది.