భారీ వర్షం కురిసినా.. నీరు నిల్వదు

ఐటీ కారిడార్‌లోని ఓఆర్‌ఆర్‌ వెంబడి నిర్మించిన సోలార్‌ రూఫ్‌ టాప్‌ సైకిల్‌ ట్రాక్‌ తుది మెరుగులు దిద్దుకుంటున్నది. నగరానికి మణిహారంలా ఉన్న ఔటర్‌పై ఈ ప్రాజెక్టును అంతర్జాతీయ ప్రమాణాలతో ప్రతిష్టాత్మకంగా చేపట్టారు. భారీ వర్షం కురిసినప్పుడు నగర రహదారులు జలమయమవుతాయి.

• అద్భుతంగా ఓఆర్‌ఆర్‌ సైకిల్‌ ట్రాక్‌ డిజైన్‌.. ట్రాక్‌ పొడవునా ప్రత్యేక వరద నీటి లైన్‌

సిటీబ్యూరో, సెప్టెంబర్‌ 11 (నమస్తే తెలంగాణ): ఐటీ కారిడార్‌లోని ఓఆర్‌ఆర్‌ వెంబడి నిర్మించిన సోలార్‌ రూఫ్‌ టాప్‌ సైకిల్‌ ట్రాక్‌ తుది మెరుగులు దిద్దుకుంటున్నది. నగరానికి మణిహారంలా ఉన్న ఔటర్‌పై ఈ ప్రాజెక్టును అంతర్జాతీయ ప్రమాణాలతో ప్రతిష్టాత్మకంగా చేపట్టారు. భారీ వర్షం కురిసినప్పుడు నగర రహదారులు జలమయమవుతాయి. ట్రాఫిక్‌కు అంతరాయం కలుగుతుంది. ఇలాంటి పరిస్థితి ఉత్పన్నం కాకుండా హైదరాబాద్‌ మహానగరాభివృద్ధి సంస్థ (హెచ్‌ఎండీఏ) ఇంజినీరింగ్‌ అధికారులు సైకిల్‌ ట్రాక్‌ పొడవునా ప్రత్యేకంగా వరద నీటి కాలువను సుమారు 3.5 అడుగుల లోతు, 4 అడుగుల వెడల్పుతో నిర్మించారు.

వాన నీరు పారేందుకు..
రహదారులపై ఎంత భారీ వర్షం కురిసినా.. వెంటనే లోతైన కాలువలోకి వెళ్లేలా డిజైన్‌ చేసి నిర్మాణ పనులు చేపట్టారు. సైకిల్‌ ట్రాక్‌ నిర్మాణంతో పాటే వర్షపు నీరు పారేందుకు లోతైన కాలువను ఓఆర్‌ఆర్‌ సర్వీసు రోడ్డు లోపలి వైపు కట్టారు. దీంతో వర్షపు నీరు ఎన్ని కిలోమీటర్ల దూరం వెళ్లినా రోడ్ల మీదకు రాకుండా పల్లపు ప్రాంతాలకు పారేలా కాలువలను డిజైన్‌ చేశారు. ఓఆర్‌ఆర్‌ కింద ఉన్న అండర్‌పాస్‌ల కింద నుంచి మూసీలోకి వెళ్లే వరద కాలువల్లోకి వెళ్లేలా డిజైన్‌ చేసి నిర్మాణ పనులు చేపట్టామని హెచ్‌ఎండీఏ ఇంజినీరింగ్‌ అధికారులు తెలిపారు.

23 కి.మీ పొడవునా సైకిల్‌ ట్రాక్‌
నానక్‌రాంగూడ నుంచి తెలంగాణ పోలీస్‌ అకాడమీ వరకు, నార్సింగి నుంచి కొల్లూరు వరకు కొత్తగా నిర్మించిన సైకిల్‌ ట్రాక్‌ పొడవు సుమారు 23. కి.మీ దాకా ఉంటుంది. ఓఆర్‌ఆర్‌ లోపలి వైపు ఉన్న సర్వీసు రోడ్డుపై ట్రాఫిక్‌ సైతం గణనీయంగా పెరగడంతో 2 వరసలు ఉన్న రోడ్డును 4 లేన్లుగా నిర్మించారు. ఇలా ఒకేసారి సర్వీసు రోడ్ల విస్తరణ, సైకిల్‌ ట్రాక్‌ నిర్మాణం పనులు ఏకకాలంలో చేపట్టారు. రోడ్లమీద వర్షపు నీరు నిలిచిపోయే సమస్య ఉత్పన్నం కాకుండా శాశ్వత పరిష్కారం చూపారు. సోలార్‌ రూఫ్‌ టాప్‌ సైకిల్‌ ట్రాక్‌ నిర్మాణంలో సైకిలిస్టుల భద్రతకు అధిక ప్రాధాన్యతనిచ్చారు.