హైదరాబాద్ : ఇన్స్టాగ్రామ్లో యువతి ఫోటోతో ఖాతా ఓపెన్ చేసిన ఓ యువకుడు అమ్మాయిలను వేధింపులకు గురి చేస్తున్నాడు. అమ్మాయిల న్యూడ్ ఫోటోలు అడ్డం పెట్టుకుని లైంగికంగా వేధిస్తున్నాడు. యువతులను మోసం చేసిన కామాంధుడిని పోలీసులు అరెస్టు చేశారు.
వరంగల్ జిల్లా పరకాలకు చెందిన పాలకుర్తి అజయ్ దిల్సుఖ్నగర్లో ఉంటూ.. మల్టీమీడియా విద్యను అభ్యసిస్తున్నాడు. అయితే ఇన్స్టాగ్రామ్లో ఓ యువతి ఫోటోతో ఖాతా తెరిచాడు. ఇక అమ్మాయిలకు ఫ్రెండ్ రిక్వెస్ట్ పంపి.. వారితో క్లోజ్ ఫ్రెండ్లా చాట్ చేస్తాడు. మీ ఫోటోలు పంపించండి అని అడగడంతో.. అమ్మాయే కదా అని వారు కూడా ఫోటోలు పంపిస్తారు. ఆ తర్వాత సదరు యువతులను వేధింపులకు గురి చేస్తాడు. న్యూడ్ ఫోటోలు పంపించకపోతే ఫోటోలు మార్ఫింగ్ చేసి స్నేహితులకు, బంధువులకు సోషల్ మీడియాలో పోస్ట్ చేస్తానని బెదిరింపులకు దిగుతాడు ఆ కీచకుడు.
న్యూడ్ ఫోటోలు పంపించిన తర్వాత వాటిని అడ్డుపెట్టుకుని.. తన కోరిక తీర్చాలని లేదంటే సోషల్ మీడియాలో అప్లోడ్ చేస్తానని బెదిరింపులకు గురి చేస్తాడు. ఇలా అనేక మంది యువతులను అజయ్ మోసం చేశాడు. అయితే 15 రోజుల క్రితం ఓ యువతి అజయ్పై సైబర్క్రైమ్ పోలీసులకు ఫిర్యాదు చేసింది. కేసు నమోదు చేసుకున్న పోలీసులు దర్యాప్తు చేపట్టి, దిల్సుఖ్నగర్లో అజయ్ను బుధవారం రాత్రి అదుపులోకి తీసుకున్నారు.