అంబర్పేట, జూన్ 13 : పదేండ్ల బాలికపై ఓ యాచకుడు అత్యాచారానికి యత్నించిన సంఘటన నల్లకుంట పోలీస్స్టేషన్ పరిధిలో జరిగింది. ఇన్స్పెక్టర్ మొగిలిచెర్ల రవి, స్థానికులు తెలిపిన వివరాల ప్రకారం.. నల్లకుంట స్ట్రీట్ నంబర్ నాలుగు మూలమలుపు దగ్గర బాలిక(10)ను వెంకటేశ్(25) అనే యాచకుడు దగ్గరకు పిలిచాడు. వైట్నార్ తాగిన మత్తులో ఉన్న అతడు ఆ బాలికను అక్కడున్న రెండు కార్ల మధ్యలోకి లాక్కెళ్లి అత్యాచారయత్నానికి యత్నించాడు.
బాలిక కేకలు వేయడంతో స్థానికులు అక్కడికి చేరుకోవడంతో బాలికను విచక్షణారహితంగా కొట్టి కింద పడేసి తొక్కి పారిపోయాడు. దీంతో స్థానికులు నల్లకుంట పోలీసులకు సమాచారం అందించారు. సంఘటన స్థలానికి చేరుకున్న ఇన్స్పెక్టర్ రవి తీవ్రంగా గాయపడిన ఆ బాలికను చికిత్స నిమిత్తం ఉస్మానియా దవాఖానకు తరలించారు. సంఘటన స్థలాల్లో ఉన్న సీసీటీవీ పుటేజీల ఆధారంగా పోలీసులు వివరాలు సేకరిస్తున్నారు. ఇదిలా ఉండగా.. కాచిగూడ పోలీసులు అతన్ని రైల్వేస్టేషన్లో అదుపులోకి తీసుకున్నట్లు తెలిసింది. కేసు నమోదు చేసుకొని దర్యాప్తు చేస్తున్నారు.