Visit:
మన్సూరాబాద్‌, నవంబర్‌ 30: ఆటోనగర్‌లో వ్యర్థ రసాయనాలు, జంతు కళేబరాల డంపింగ్‌, మహావీర్‌ హరిణ వనస్థలి నేషనల్‌ పార్కులోని కుంటలో చేరుతున్న వ్యర్థాలతో వెదజల్లుతున్న దుర్వాసనతో ప్రజలు ఎదుర్కొంటున్న ఇబ్బందుల పరిష్కారం కోసం నాగోల్‌, మన్సూరాబాద్‌ డివిజన్‌ పరిధికి చెందిన 10 కాలనీలు జాయింట్‌ యాక్షన్‌ కమిటీగా ఏర్పడ్డాయి. సెవన్‌హిల్స్‌ కాలనీ, స్వాతిగార్డెన్‌, ద్వారకానగర్‌, డీపీ నగర్‌, హిమపురికాలనీ ఫేజ్‌-1, 2, సౌత్‌ఎండ్‌ పార్కు కాలనీ, సహారాస్టేట్స్‌, జడ్జెస్‌ కాలనీ, చండీశ్వర్‌ కాలనీ, ప్రెస్‌ కాలనీల ప్రజలు ఎదుర్కొంటున్న వ్యర్థ రసాయనాల డంపింగ్‌ సమస్యను వివరించేందుకు ఆదివారం సెవన్‌హిల్స్‌ కాలనీలో జేఏసీ అధ్యక్షుడు కత్తుల రాంబాబు ఆధ్వర్యంలో సమావేశాన్ని నిర్వహించి ఎమ్మెల్యే దేవిరెడ్డి సుధీర్‌రెడ్డిని ఆహ్వానించారు.
సమావేశానికి హాజరైన ఎమ్మెల్యేకు తాము ఎదుర్కొంటున్న సమస్యను వివరించారు. ఆటోనగర్‌ పారిశ్రామిక వాడ నుంచి వెలువడుతున్న వ్యర్థాలతో మహావీర్‌ హరిణ వనస్థలి నేషనల్‌ పార్కులో ఏర్పడిన కుంట చెరువుగా మారిపోయిందని.. కొందరు అర్థరాత్రి వేళ కుంటలోకి వ్యర్థ రసాయనాలను వదులుతుండటం, జంతు కళేబరాల వ్యర్థాలు అందులోకి చేరుతుండటం వలన భరించలేని దుర్వాసన వెదజల్లుతుందని కాలనీవాసులు ఆవేదన వ్యక్తం చేశారు.
శాశ్వత పరిష్కారం చూపిస్తాం..
వ్యర్థ రసాయనాలు, జంతు కళేబరాల డంపింగ్‌ నుంచి వెలువడిన వ్యర్థాలు అటవీశాఖ పరిధిలో కుంటగా మారిన ప్రాంతానికి చేరుతుండటం వలన వెలువడుతున్న దుర్వాసనకు శాశ్వత పరిష్కారం చూపేందుకు చర్యలు తీసుకుంటున్నామని ఎమ్మెల్యే దేవిరెడ్డి సుధీర్‌రెడ్డి తెలిపారు. కెమికల్‌లు అందులోకి ఏ విధంగా వచ్చి చేరుతున్నాయనే విషయంపై విచారణ జరిపిస్తామని తెలిపారు. సమస్య పరిష్కారం కోసం చర్యలు తీసుకోవాల్సిందిగా ఇప్పటికే ఐలా, పీసీబీ, జీహెచ్‌ఎంసీ, అటవీశాఖ అధికారులను ఆదేశించడం జరిగిందన్నారు. కుంటలోకి చేరిన వ్యర్థ రసాయనాలను మోటర్ల ద్వారా బయటకు పంపిస్తున్నారని దీనివలన వారంరోజుల్లో దుర్వాసన బంద్‌ అవుతుందన్నారు. ఈ ప్రక్రియకు స్థానికులు సహకరించాలని ఎమ్మెల్యే కోరారు.
రూ.7.50 కోట్లతో ట్రంక్‌టైన్‌ ఏర్పాటు చేస్తాం..
అదేవిధంగా సుమారు రూ.7.50 కోట్లతో నూతనంగా వరదనీటి ట్రంకులైన్‌ను ఏర్పాటు చేస్తున్నామని ఆ పనులు పూర్తయితే దుర్వాసన సమస్యకు శాశ్వతన పరిష్కారం లభిస్తుందన్నారు. రాత్రి సమయాల్లో కొందరు గుర్తుతెలియని వ్యక్తులు కేబీఆర్‌ గార్డెన్‌ నుంచి ఆటోనగర్‌ పారిశ్రామికవాడకు వెళ్లే రోడ్డుకు ఇరువైపులా వ్యర్థాలను డంపింగ్‌ చేస్తున్నారన్నారు. డంపింగ్‌ను కొందరు స్థానికులు ప్రోత్సహిస్తున్నట్లు సమాచారం ఉందన్నారు. సంవత్సరం క్రితం వ్యర్థ రసాయనాల దుర్వాసన సమస్య ఉత్పన్నమైనప్పుడు ఆటోనగర్‌లోని గోడౌన్ల పరిశీలించడం జరిగిందన్నారు. మూడు గోడౌన్లలో కాలం ముగిసిన ఫెర్టిలైజర్స్‌ ఉన్నట్లు గుర్తించామని.. వ్యర్థ రసాయనాల డంపింగ్‌తో పాటు కాలం చెల్లిన ఫెర్టిలైజర్స్‌ను ఆటోనగర్‌ డంపింగ్‌ యార్డు ప్రాంతంలో పారబోస్తుండటం వలన దుర్వాసన వస్తున్నట్లు గ్రహించామన్నారు.
పీసీబీ అధికారుల దృష్టికి తీసుకెళ్లి కొంత మేర సమస్యను పరిష్కరించామన్నారు. త్వరలో శాశ్వత పరిష్కారం చూపిస్తామన్నారు. సెవన్‌హిల్స్‌ కాలనీ అధ్యక్షుడు, జేఏసీ ప్రెసిడెంట్‌ కత్తుల రాంబాబు అధ్యక్షతన జరిగిన ఈ కార్యక్రమంలో మాజీ కార్పొరేటర్‌ కొప్పుల విఠల్‌రెడ్డి, నాయకులు అనంతుల రాజిరెడ్డి, పోచబోయిన జగదీష్‌యాదవ్‌, రుద్ర యాదగిరి, గొల్ల సతీష్‌యాదవ్‌, సిద్దగోని నర్సింహగౌడ్‌, వివిధ కాలనీల సంక్షేమ సంఘం ప్రతినిధులు ఎం.రమేష్‌బాబు, టీ రవికుమార్‌, మార్గం రాజేష్‌, జనార్ధన్‌, భిక్షం, యాదగిరి, జాల రాధాకిషన్‌, గోపిక్రిష్ణా రెడ్డి, మధుసూదన్‌ రెడ్డి, రవికిరణ్‌ చారి తదితరులు పాల్గొన్నారు.
