Hyderabad Metro | అంతన్నారు… ఇంతన్నారు… ఆఖరుకు అత్తెసరుతో సరిపెట్టారు.. మెట్రో విస్తరణకు 1100 కోట్లే

అంతన్నారు... ఇంతన్నారు... ఆఖరుకు అత్తెసరుతో సరిపెట్టారు. బడ్జెట్‌లో కేటాయించిన నిధులు ప్రతిపాదిత మెట్రో కారిడార్ల విస్తరణలో ఆస్తుల సేకరణకే సరిపోని పరిస్థితి. ఆర్భాటంగా ప్రచారాలు చేసి హడావుడిగా శంకుస్థాపనలు చేసి కొండంత రాగం తీసిన ప్రభుత్వం తీరా బడ్జెట్‌లో మాత్రం అరకొరగా ప్రకటించి చేతులు దులుపుకున్నది.

• మెట్రో విస్తరణకు 24042 కోట్లు అవసరం
• సర్కారు ప్రకటించింది 1100 కోట్లే
• ఆస్తుల సేకరణకే ఆ నిధులు చాలవు
• ఇంకా కావలసింది 22,942 కోట్లు

Hyderabad Metro | సిటీబ్యూరో, జూలై 25 (నమస్తే తెలంగాణ): అంతన్నారు… ఇంతన్నారు… ఆఖరుకు అత్తెసరుతో సరిపెట్టారు. బడ్జెట్‌లో కేటాయించిన నిధులు ప్రతిపాదిత మెట్రో కారిడార్ల విస్తరణలో ఆస్తుల సేకరణకే సరిపోని పరిస్థితి. ఆర్భాటంగా ప్రచారాలు చేసి హడావుడిగా శంకుస్థాపనలు చేసి కొండంత రాగం తీసిన ప్రభుత్వం తీరా బడ్జెట్‌లో మాత్రం అరకొరగా ప్రకటించి చేతులు దులుపుకున్నది. ప్రభుత్వం విస్తరించాలనుకున్న 78.4 కిలోమీటర్ల పొడవైన మెట్రో కారిడార్లకు గాను అవసరమైన వ్యయం 24,042 కోట్ల రూపాయలు. కానీ బడ్జెట్‌లో మాత్రం కేవలం 1100 కోట్లు కేటాయించారు.

వ్యయానికి కేటాయింపులకు పొంతనేదీ?

గత కేసీఆర్‌ ప్రభుత్వం 2023 బడ్జెట్‌లో మెట్రో విస్తరణకు రూ.2500 కోట్లను కేటాయించి రాయదుర్గం నుంచి శంషాబాద్‌ ఎయిర్‌పోర్టు వరకు పనులు మొదలు పెట్టింది. కాగా కాంగ్రెస్‌ ప్రభుత్వం అధికారంలోకి రాగానే ఆ ప్రాజెక్టును పూర్తిగా రద్దు చేసింది. మెట్రో రెండో దశ ప్రతిపాదనలను సమీక్షించి వాటిని సవరించి కొత్త ప్రతిపాదనలను రూపొందించింది. ఇందులో భాగంగా 78.4 కిలోమీటర్ల పొడవైన కొత్త మెట్రో కారిడార్‌ను 24,042 కోట్లతో అభివృద్ధి చేయాలని నిర్ణయిచింది. మెట్రో రైలును పాత నగరానికి 5.5 కిలోమీటర్ల మేర పొడిగించి దాన్ని శంషాబాద్‌ విమానాశ్రయానికి అనుసంధానం చేయాలని ప్రణాళిక రచించారు.

ఎల్బీనగర్‌ నుండి నాగోలుకు 7 కిలోమీటర్ల మేర కారిడార్‌ను విస్తరించాలని, నాగోలు, ఎల్బీనగర్‌, చంద్రాయణగుట్ట స్టేషన్లను ఇంటర్‌ చేంజ్‌ స్టేషన్లుగా అభివృద్ధి చేయాలని నిర్ణయించారు. మియాపూర్‌ నుండి పటాన్‌ చెరువుకు 14 కిలోమీటర్ల మేర మెట్రో రైలు సౌకర్యాన్ని పొడిగించాలని ప్రణాళిక సిద్ధం చేశారు. కానీ ఒక్క పాతనగరంలోనే దాదాపు 1100 ఆస్తులను సేకరించాల్సి ఉంది. వీటికే దాదాపుగా 2వేల కోట్లు అవసరమవుతాయని అంచనా. 24వేల కోట్లకు పైగా వ్యయమయ్యే మెట్రో పనుల విస్తరణపై ఆర్భాటంగా ప్రకటనలు చేసి కేవలం 5 శాతం మాత్రమే నిధులు సమకూరిస్తే పనులు ముందుకు సాగేది ఎలా అని నిపుణులు ప్రశ్నిస్తున్నారు.