Visit:
Detox Drinks | ఆరోగ్యాన్ని మెరుగుపరుచుకోవడం, శరీరంలోని విషపదార్థాలను తొలగించడం, బరువు తగ్గడం వంటి ప్రయోజనాలు కలుగుతాయనే ప్రచారంతో హెర్బల్ డిటాక్స్ డ్రింక్స్, డిటాక్స్ టీలు, గ్రీన్ జ్యూస్లు ఇటీవలి కాలంలో బాగా ప్రాచుర్యం పొందాయి. అయితే వీటిని తరచూ తీసుకోవడం వల్ల శరీరానికి మేలు కంటే కొన్ని సందర్భాల్లో హాని కలిగే అవకాశం ఉందని వైద్య నిపుణులు హెచ్చరిస్తున్నారు. మన శరీరంలోనే కాలేయం, మూత్రపిండాలు సహజమైన డిటాక్స్ వ్యవస్థగా పనిచేస్తాయి. కాలేయం రసాయనాలు, మందులు, వ్యర్థ పదార్థాలను విచ్ఛిన్నం చేస్తుండగా, మూత్రపిండాలు ప్రతిరోజూ పెద్ద మొత్తంలో రక్తాన్ని వడపోసి వ్యర్థాలను తొలగించడంతోపాటు శరీరంలోని ద్రవాల సమతుల్యతను నియంత్రిస్తాయి. అందువల్ల ప్రత్యేకంగా డిటాక్స్ డ్రింక్స్ తీసుకోవాల్సిన అవసరం లేదని నిపుణులు చెబుతున్నారు.
కొన్ని హెర్బల్ డిటాక్స్ పానీయాల్లో డాండెలియన్, జునిపర్, హార్స్టెయిల్ వంటి సహజ మూత్రవిసర్జక పదార్థాలు ఉంటాయి. ఇవి శరీరం నుంచి నీటిని వేగంగా బయటకు పంపుతాయి. దీంతో కొంతకాలం బరువు తగ్గినట్లు కనిపించినా అది కొవ్వు తగ్గడం కాదని శరీరంలోని నీరు తగ్గడం మాత్రమే అవుతుందని నిపుణులు చెబుతున్నారు. అధికంగా నీరు కోల్పోవడం వల్ల డీహైడ్రేషన్ ఏర్పడి రక్త పరిమాణం తగ్గుతుంది. ఇది మూత్రపిండాల పనితీరుపై ఒత్తిడిని పెంచుతుంది. అలాగే కొన్ని గ్రీన్ జ్యూస్లు, సాంద్రీకృత మొక్కల సారాల్లో ఆక్సలేట్లు అధికంగా ఉంటాయి. ఇవి కాల్షియంతో కలిసి మూత్రపిండాల్లో రాళ్లు ఏర్పడే ప్రమాదాన్ని పెంచడంతోపాటు కొన్ని సందర్భాల్లో మూత్రపిండాలపై తీవ్రమైన ప్రభావాన్ని చూపే అవకాశం ఉంది.
డిటాక్స్ టీలలో ఉండే సెన్నా, కాస్కారా వంటి సహజ విరేచన పదార్థాలను ఎక్కువకాలం తీసుకోవడం వల్ల విరేచనాలు, జీర్ణ సమస్యలు ఏర్పడి శరీరంలోని పొటాషియం, సోడియం వంటి ముఖ్యమైన ఖనిజాలు తగ్గిపోతాయి. ఎలక్ట్రోలైట్ల సమతుల్యత మూత్రపిండాల సాధారణ పనితీరుకు ఎంతో అవసరం. మరోవైపు, సరైన నియంత్రణ లేని కొన్ని హెర్బల్ ఉత్పత్తుల్లో వాటి పదార్థాల పూర్తి వివరాలు స్పష్టంగా ఉండవు. లికోరైస్ రూట్ వంటి కొన్ని మూలికలు రక్తపోటును పెంచి మూత్రపిండాల పనితీరుపై ప్రభావం చూపే అవకాశం ఉంది. ఇప్పటికే మూత్రపిండాల సమస్యలు ఉన్నవారు, ప్రతిరోజూ మందులు వాడేవారు, వృద్ధులు ఇటువంటి ఉత్పత్తులతో మరింత జాగ్రత్తగా ఉండాలి.
మూత్రపిండాల ఆరోగ్యాన్ని కాపాడుకోవడానికి ప్రత్యేకమైన డిటాక్స్ పానీయాలపై ఆధారపడాల్సిన అవసరం లేదు. రోజంతా తగినంత నీరు తాగడం, ఉప్పు తీసుకునే పరిమాణాన్ని నియంత్రించడం, సమతుల్యమైన పోషకాహారం తీసుకోవడం వంటి సాధారణ అలవాట్లు ఎంతో ఉపయోగకరంగా ఉంటాయి. ఇబుప్రోఫెన్ వంటి నొప్పి నివారణ మందులను వైద్యుల సూచన లేకుండా తరచూ ఉపయోగించకుండా జాగ్రత్తపడాలి. అధిక శక్తి కలిగిన హెర్బల్ సప్లిమెంట్లు లేదా డిటాక్స్ ఉత్పత్తులను ఉపయోగించే ముందు వైద్యులను సంప్రదించడం మంచిది. శరీరంలోని సహజమైన డిటాక్స్ వ్యవస్థను ఆరోగ్యంగా ఉంచడమే మూత్రపిండాల సంరక్షణకు ముఖ్యమైన మార్గమని వారు సూచిస్తున్నారు.
