ఒక అస్పష్టమైన వాసన ముక్కుపుటాలకు తాకినప్పుడు.. మనం గత స్మృతుల్లోకి వెళ్లడాన్ని.. ఏదో ఓ సందర్భంలో అనుభూతించే ఉంటాం. అంతేకాదు. ఆ వాసనతో ముడిపడిన జ్ఞాపకాలు కూడా మనసులో మెదులుతాయి. ఈ లక్షణమే యూనివర్సిటీ ఆఫ్ కాలిఫోర్నియా పరిశోధకులను వృద్ధుల్లో వచ్చే మతిమరుపు వ్యాధి.. డెమెన్షియా చికిత్సకు పరిష్కారం కొనుగొనే దిశగా అడుగులు వేయించింది. అత్తర్లతో చికిత్స చేసి వృద్ధుల్లో చెరిగిపోయిన జ్ఞాపకాలను చిగురింపజేయాలనేది పరిశోధకుల ప్రయత్నం. తమ అధ్యయనం కోసం కొంతమంది వయోధికులను రెండు వర్గాలుగా విభజించారు.
ఒకవైపు వారిని అత్తరు పరిమళానికి గురిచేశారు. మరో వర్గానికి అలాంటి ఏర్పాటు చేయలేదు. ఆరు నెలలపాటు రోజూ ఇలా చేస్తూ వచ్చారు. మిగిలిన వారికంటే.. పరిమళం పీల్చిన పెద్దల్లో జ్ఞాపకశక్తి సామర్థ్యం 226 శాతం మెరుగుపడినట్టు గుర్తించారు. సువాసనల ప్రభావం వల్ల భాషా నైపుణ్యాలు పెరిగినట్టు, కుంగుబాటు తగ్గినట్టు, ఘ్రాణశక్తి మెరుగుపడినట్టు ఇంతకుముందు పరిశోధనల్లోనే తేలింది. ఈ ఫలితాలనే వృద్ధుల్లో డెమెన్షియాపై పోరాటానికి ఉపయోగించుకోవాలని చూస్తున్నారు పరిశోధకులు. పైగా రోజూ రాత్రిళ్లు ఓ రెండు గంటలపాటు అత్తరు పరిమళాన్ని ఆస్వాదించిన వారికి నిద్ర కూడా బాగా పట్టిందట.