Health Tips | సమతుల ఆహారమే.. మన ఆరోగ్యానికి హామీ

మన ఆరోగ్యానికి సమతుల ఆహారమే హామీ ఇస్తుంది. రోజువారీ భోజనంలో అన్నంతోపాటు ఐదు రకాల రంగురంగుల కూరగాయలను సమపాళ్లలో తీసుకోవాలని పోషకాహార నిపుణులు సూచిస్తున్నారు.

Health Tips | మన ఆరోగ్యానికి సమతుల ఆహారమే హామీ ఇస్తుంది. రోజువారీ భోజనంలో అన్నంతోపాటు ఐదు రకాల రంగురంగుల కూరగాయలను సమపాళ్లలో తీసుకోవాలని పోషకాహార నిపుణులు సూచిస్తున్నారు. ఇలా చేస్తే తినే పళ్లాన్నే కాకుండా మన జీవితాన్నీ రంగులమయం చేసుకోవచ్చు, ఆరోగ్యంగా బతికేయొచ్చు.

క్యారట్లు

128 గ్రాములు తీసుకోవాలి. వీటిలో విటమిన్‌ ఎ పుష్కలంగా ఉంటుంది. రోజువారీగా అవసరమైన ఎ విటమిన్‌లో 119 శాతం దీన్నుంచి లభిస్తుంది. క్యాన్సర్‌ నివారణకు వీటిలో ఉండే బీటా కెరోటిన్‌ అనే యాంటీ ఆక్సిడెంట్‌ దోహదపడుతుంది.

పాలకూర

30 గ్రాములు తీసుకోవాలి. రోజువారీ విటమిన్‌ ఎ అవసరంలో 16 శాతం లభిస్తుంది. అలానే విటమిన్‌ కె 120 శాతం అందుతుంది. క్యాన్సర్‌ ముప్పును పాలకూర తగ్గిస్తుంది.

బ్రకోలి

91 గ్రాముల బ్రకోలి నుంచి రోజువారీ విటమిన్‌ కె 77 శాతం లభిస్తుంది. విటమిన్‌ సి 90 శాతం అందుతుంది. అదనంగా ఫోలేట్‌, మాంగనీస్‌, పొటాషియం కూడా లభిస్తాయి. ఇది కూడా క్యాన్సర్‌ ముప్పును తగ్గిస్తుంది. గుండెజబ్బులకు సంబంధించిన ఇన్‌ఫ్లమేటరీ కారకాలను నియంత్రిస్తుంది.

పచ్చి బటానీలు

160 గ్రాముల బటానీల్లో 9 గ్రాముల ఫైబర్‌, 9 గ్రాముల ప్రొటీన్‌ ఉంటుంది. ఎ, సి, కె విటమిన్లు, రిబోఫ్లెవిన్‌, థయామిన్‌, నియాసిన్‌ లాంటి బి కాంప్లెక్స్‌ విటమిన్లు, ఫోలేట్‌ సమృద్ధిగా ఉంటాయి. జీర్ణవ్యవస్థ ఆరోగ్యానికి, ట్యూమర్ల ముప్పు తగ్గడానికి పచ్చి బటానీలు దోహదపడతాయి.

కేల్‌

21 గ్రాముల కేల్‌లో పొటాషియం, క్యాల్షియం, కాపర్‌, ఎ, బి, సి, కె విటమిన్లు అందుతాయి. రక్తంలో చక్కెర స్థాయులు, బీపీ, కొలెస్ట్రాల్‌ స్థాయులను ఇది తగ్గిస్తుంది.