Health | సువాసనలే కాదు, దుర్వాసనలూ రకరకాలు. ఒక్కో వాసన ఓ అనారోగ్యాన్నిసూచిస్తుంది. ఆ సంకేతాన్ని అర్థం చేసుకోగలిగితే.. ఇదో హెచ్చరికలానూ పనిచేస్తుంది. అరచేతులు, చంకలు, వ్యక్తిగత భాగాలు, పాదాలు.. శరీరంలో చెడువాసన కార్ఖానాలు అనేకం. మనం తినే ఆహారాన్ని బట్టి, మనల్ని పీడిస్తున్న ఆరోగ్య సమస్యలను బట్టి, మనం వాడే మందుల్ని బట్టి కూడా వాసన మారిపోతుంది.
➣ లైంగిక వ్యాధులు, యూరినరీ ట్రాక్ ఇన్ఫెక్షన్ తదితర రుగ్మతలు ఉన్నవారి దగ్గర మూత్రాన్ని గుర్తుకుతెచ్చే దుర్వాసన గుప్పుమంటూ ఉంటుంది.
➣ కొందరి నుంచి పులిసిన పండ్లను గుర్తుకుతెచ్చేలా దుర్వాసన వస్తూ ఉంటుంది. మధుమేహం ఉన్నవారిలో ఇలాంటి ఇబ్బంది ఎక్కువ.
➣ ఎసిడిటీ బాధితులు నోరు తెరిస్తే చాలు.. చెత్తకుప్ప పక్కన నిలబడినట్టు అనిపిస్తుంది.
➣ కొందరికి ముక్కులోంచి కూడా దుర్వాసన వస్తుంది. నాసికంలోని నాళాలలో ఏదైనా సమస్య ఉన్నప్పుడు ఇలా జరుగుతుంది.
➣ చెవికి ఇన్ఫెక్షన్ సోకినప్పుడు అటువైపు నుంచి కూడా దుర్వాసన విస్తరిస్తుంది.
➣ ఫంగస్ దాడికి గురైనప్పుడు పాదాలు కంపుకొడతాయి.
➣ మలమూత్రాలు ఒక పరిమితికి మించి దుర్వాసనను వెదజల్లుతుంటే తేలిగ్గా తీసుకోవడానికి వీల్లేదు.
➣ చాలామంది ఈ సమస్యను అత్తర్లతోనో, టాల్కం పౌడర్ల తోనో కప్పిపెట్టాలని చూస్తారు. నిజానికి దుర్వాసన ఓ రుగ్మత కాదు. ఒకానొక రుగ్మతకు సంకేతం. ఈ విషయాన్ని అర్థం చేసుకుంటే చాలు.