మా అమ్మాయికి నాలుగేండ్లు. కొద్దిరోజులుగా కుంటినట్టు నడుస్తున్నది. వేగంగా అడుగులు వేయలేదు. పరిగెత్తనూలేదు. నొప్పి ఉందేమో అనిపిస్తుంది. మిగతా విషయాల్లో సాధారణంగానే ఉంటుంది. ఏ ఆరోగ్య సమస్యలూ లేవు. ప్రీ స్కూల్లో వేశాం. అక్కడ కూడా చురుగ్గానే ఉంటుంది. మాకేమో ఆందోళనగా ఉంది. ఏం చేయాలో తోచడం లేదు.
బిడ్డ సాధారణంగా నడవలేకపోవడం తీవ్ర సమస్యే. స్కూల్లో ఆడుకుంటున్నప్పుడు కింద పడిందేమో తెలుసుకోండి. కాలికి దెబ్బలు తగిలాయేమో పరీక్షించండి. తల్లిదండ్రులు తిడతారనే భయంతో పిల్లలు గాయాల గురించి చెప్పరు. మౌనంగా నొప్పిని భరిస్తారు. ఓసారి పరీక్షించి చూడండి. అన్నిసార్లూ గాయాలు బయటికి కనిపించకపోవచ్చు కూడా. కొన్నిసార్లు జలుబు, దగ్గు తదితర ఇన్ఫెక్షన్ల తర్వాత మోకీళ్లలో నీళ్లు చేరుతాయి. దీన్నే ‘రియాక్టివ్ ఆర్థరైటిస్’ అంటారు. దీంతో, కదలికల్లో ఇబ్బంది ఏర్పడుతుంది. సరిగా నడవలేరు. లేదంటే, జాయింట్ ఇన్ఫెక్షన్ అయినా కావచ్చు. తీవ్రమైన నీరసం, ధారాళంగా చెమటలు దీని లక్షణాలు. కారణం ఏదైనా, ఒకసారి పీడియాట్రీషియన్ను కలవండి. అవసరమైతే పీడియాట్రిక్ ఆర్థోపెడిక్ సర్జన్ను కూడా సంప్రదించండి. డాక్టర్ సిఫారసుతో బ్లడ్ టెస్ట్, స్కానింగ్ తదితర పరీక్షలు చేయించండి. భయపడాల్సిన పన్లేదు.