Cancer | క్యాన్స‌ర్‌ను న‌యం చేస్తామంటూ సోష‌ల్ మీడియాలో తెగ ప్ర‌చారం.. హెచ్చ‌రిస్తున్న వైద్య నిపుణులు..

క్యాన్సర్‌ అనేది ఒకే రకమైన వ్యాధి కాదు. దాని రకం, దశ, రోగి ఆరోగ్య పరిస్థితిని బట్టి చికిత్స మారుతుంది. అయినప్పటికీ, సామాజిక మాధ్యమాల్లో నిరూపణ లేని చికిత్సా పద్ధతులను ఆధునిక వైద్యానికి ప్రత్యామ్నాయాలుగా ప్రచారం చేస్తున్నారు. క్యాన్సర్‌ నిర్ధారణ అయినప్పుడు రోగులు, వారి కుటుంబ సభ్యులు భయం, ఆందోళనకు గురవుతారు.

Cancer | క్యాన్సర్‌ అనేది ఒకే రకమైన వ్యాధి కాదు. దాని రకం, దశ, రోగి ఆరోగ్య పరిస్థితిని బట్టి చికిత్స మారుతుంది. అయినప్పటికీ, సామాజిక మాధ్యమాల్లో నిరూపణ లేని చికిత్సా పద్ధతులను ఆధునిక వైద్యానికి ప్రత్యామ్నాయాలుగా ప్రచారం చేస్తున్నారు. క్యాన్సర్‌ నిర్ధారణ అయినప్పుడు రోగులు, వారి కుటుంబ సభ్యులు భయం, ఆందోళనకు గురవుతారు. సరైన సమాచారం, చికిత్స కోసం వైద్యులను సంప్రదించడంతో పాటు సామాజిక మాధ్యమాలు, ఆన్‌లైన్‌ వీడియోలు, సంప్రదాయ పద్ధతులు, ఇతరుల అనుభవాలపై ఆధారపడుతుంటారు. అయితే, ఇలాంటి సమయంలో తప్పుడు ప్రచారాన్ని నమ్మడం చికిత్స నిర్ణయాలపై ప్రభావం చూపుతుంది. క్యాన్సర్‌ చికిత్సలో ఆశ చాలా ముఖ్యం. కానీ శాస్త్రీయ ఆధారాలు లేని హామీలపై ఆశ ఆధారపడకూడదు.

సోష‌ల్ మీడియాలో పెరుగుతున్న ప్ర‌చారం..

సామాజిక మాధ్యమాల్లో కొన్ని ప్రత్యామ్నాయ చికిత్సలు క్యాన్సర్‌ను పూర్తిగా నయం చేస్తాయని, ఆధునిక వైద్య చికిత్సలు హానికరమని ప్రచారం చేస్తున్నారు. కొందరు తమకు నయమైందంటూ వ్యక్తిగత అనుభవాలను పంచుకుంటారు. అయితే, ఒకరి అనుభవం ఆధారంగా ఏదైనా మందు కణితిని తగ్గిస్తుందని, క్యాన్సర్‌ మళ్లీ రాకుండా అడ్డుకుంటుందని లేదా ప్రాణాపాయం తగ్గిస్తుందని నిర్ధారించలేం. ఇలాంటి వాదనలకు శాస్త్రీయ పరిశోధనలు, విశ్వసనీయమైన వైద్య ఆధారాలు అవసరం. ముఖ్యంగా క్యాన్సర్‌ను పూర్తిగా నయం చేస్తామనే హామీలు, రహస్య చికిత్సా సూత్రాలు, వైద్యులు సూచించిన మందులు ఆపేయాలనే సలహాల పట్ల అప్రమత్తంగా ఉండాలి. నిరూపణ లేని చికిత్సలను నమ్మడం వల్ల అసలు చికిత్స ఆలస్యం అవుతుంది. సహజసిద్ధమైన పదార్థాలు కూడా క్యాన్సర్‌ మందులతో ప్రతిచర్యకు కారణమై వాటి పనితీరును మార్చే అవ‌కాశం ఉంటుంది. అందుకే వాడుతున్న ప్రతి సంప్రదాయ ఔషధం, పోషకాహార సప్లిమెంట్‌ గురించి వైద్యుడికి తెలియజేయాలి. ఫలితాలు రాకపోతే ఆర్థిక నష్టం, మానసిక ఒత్తిడి కూడా ఎదురవుతాయి.

నిపుణుల‌ను సంప్ర‌దించాలి..

శాస్త్రీయ ఆధారాలతో కూడిన చికిత్సలో పరిశోధనల ఫలితాలు, వైద్యుల అనుభవం, రోగి అవసరాలను పరిగణనలోకి తీసుకుంటారు. క్యాన్సర్‌ రకం, దశ, జన్యు లక్షణాలు, సాధారణ ఆరోగ్య పరిస్థితి, చికిత్సకు శరీరం స్పందించే తీరును బట్టి చికిత్సను నిర్ణయిస్తారు. వైద్యులు, శస్త్రచికిత్స నిపుణులు, రేడియేషన్‌ నిపుణులు, రేడియాలజిస్టులు, పాథాలజిస్టులతో కూడిన బృందం రోగి పరిస్థితిని సమగ్రంగా పరిశీలిస్తుంది. చికిత్సపై సందేహాలుంటే అర్హత కలిగిన మరో నిపుణుడి నుంచి రెండో అభిప్రాయం తీసుకోవచ్చు. యోగా, ధ్యానం, కౌన్సెలింగ్‌ వంటి పద్ధతులు చికిత్స సమయంలో మానసిక ప్రశాంతతకు, ఆరోగ్య మెరుగుదలకు తోడ్పడతాయి. అయితే, ఇవి క్యాన్సర్‌ చికిత్సకు ప్రత్యామ్నాయాలు కావు. వీటిని ప్రారంభించే ముందు వైద్యుడి సలహా తీసుకోవాలి.

ముందే అన్నీ తెలుసుకోవాలి..

ఏదైనా ప్రత్యామ్నాయ చికిత్సను ప్రయత్నించే ముందు అది ఆరోగ్యానికి తోడ్పడడానికా, లక్షణాలను తగ్గించడానికా, క్యాన్సర్‌ను నయం చేయడానికా అనే విషయాన్ని తెలుసుకోవాలి. దానికి శాస్త్రీయ పరిశోధనల ఆధారాలు ఉన్నాయా, వాడుతున్న మందులతో ప్రతిచర్య ఉంటుందా అని వైద్యుడిని అడగాలి. క‌చ్చితంగా నయం చేస్తామని హామీ ఇచ్చే ప్రకటనలు, వెంటనే డబ్బు చెల్లించాలని ఒత్తిడి చేసే వ్యక్తులు, వైద్య సలహా తీసుకోవద్దని చెప్పేవారి పట్ల జాగ్రత్తగా ఉండాలి. క్యాన్సర్‌ రోగులు తమ సందేహాలను వైద్యులతో స్వేచ్ఛగా చర్చించగలగాలి. వైద్యులు చికిత్స ఎందుకు సూచిస్తున్నారు, దాని వల్ల కలిగే ప్రయోజనాలు, పరిమితులు ఏమిటో వివరించాలి. సరైన సమాచారం, నమ్మకమైన వైద్య సలహా అందుబాటులో ఉంటే తప్పుడు ప్రచారాన్ని నమ్మి చికిత్సకు దూరమయ్యే ప్రమాదాన్ని తగ్గించవచ్చ‌ని నిపుణులు చెబుతున్నారు.