ఆ క‌రోనా వ్యాక్సిన్ల బూస్ట‌ర్ డోసులు సేఫ్ : లాన్సెట్ అధ్య‌య‌నం

లండ‌న్ : ఆరు విభిన్న కొవిడ్‌-19 బూస్ట‌ర్ డోసులు సుర‌క్షిత‌మ‌ని, గ‌తంలో ఆస్ట్రాజెనెకా లేదా ఫైజ‌ర్ వ్యాక్సిన్లు తీసుకున్న వారిలో బూస్ట‌ర్ డోసులతో రోగ‌నిరోధ‌క వ్య‌వ‌స్ధ మెరుగ్గా ఉంద‌ని లాన్సెట్ జ‌ర్న‌ల్‌లో ప్ర‌చురిత‌మైన తాజా అధ్య‌య‌నం వెల్ల‌డించింది. ఆస్ట్రాజెనెకా, ఫైజ‌ర్ వ్యాక్సిన్లు రెండు డోసులు తీసుకున్న వారు ఆరు నెల‌ల పాటు వైర‌స్ తీవ్ర‌త‌తో ద‌వాఖాన‌లో చేర‌డం, మ‌ర‌ణాల నుంచి వ‌రుస‌గా 79, 90 శాతం ర‌క్ష‌ణ క‌లిగిఉన్నార‌ని ప‌లు అధ్య‌య‌నాల్లో వెల్ల‌డైంద‌ని ప‌రిశోధ‌కులు చెబుతున్నారు.

నెల‌లు గడుస్తున్న కొద్దీ వ్యాక్సిన్ తీసుకున్న వారిలో కొవిడ్‌-19 ఇన్ఫెక్ష‌న్ నుంచి ర‌క్ష‌ణ త‌గ్గుముఖం ప‌డుతున్న‌ట్టు గుర్తించారు. తాజా వేరియంట్ల వ్యాప్తి నేప‌ధ్యంలో బూస్ట‌ర్ డోస్‌లుగా ఏడు వ్యాక్సిన్ల భ‌ద్ర‌త‌, రోగ‌నిరోధ‌క వ్య‌వ‌స్ధ స్పంద‌న‌, సైడ్ ఎఫెక్ట్స్‌పై ప‌రిశోధ‌న‌లు జ‌రిపారు. ఆస్ట్రాజెనెకా, ఫైజ‌ర్‌-బ‌యోఎన్‌టెక్, నోవావ్యాక్స్‌, జాన్స‌న్‌, మోడెర్నా, వాల్నెవ‌, క్యూర్‌వ్యాక్ వ్యాక్సిన్ల‌పై అధ్య‌యనం చేప‌ట్టారు.

ఈ వ్యాక్సిన్లు అన్నీ మూడో డోసుగా తీసుకునేందుకు సుర‌క్షిత‌మ‌ని, సాధార‌ణ సైడ్ ఎఫెక్ట్స్ మాత్ర‌మే క‌నిపించాయ‌ని ప‌రిశోధ‌న‌లో వెల్ల‌డైంద‌ని అధ్య‌య‌నానికి నేతృత్వం వ‌హించిన యూనివ‌ర్సిటీ హాస్పిట‌ల్ సౌథాంప్ట‌న్ ప్రొఫెస‌ర్ సౌల్ ఫాస్ట్ పేర్కొన్నారు. బూస్ట‌ర్ డోసులు తీసుకున్న మూడు నెలల నుంచి ఏడాది త‌ర్వాత త‌దుప‌రి గ‌ణాంకాల ఆధారంగా ఫ‌లితాలు ఉంటాయ‌ని చెప్పారు.