మరో మార్గమూ ఉంది!

కొందరిలో చనుమొన రొమ్ముల్లోకి పూర్తిగా చొచ్చుకుపోయి.. ఆ ప్రదేశంలో చిన్నపాటి గుంతలా కనిపిస్తుంది. అలాంటప్పుడు స్తన వ్యాయామంతో కొంతమేర సమస్య పరిష్కారం అవుతుంది.

డాక్టర్‌ గారూ.. నేను గర్భిణిని. మీరు గతవారం చెప్పినట్టుగా స్తన వ్యాయామం చేసినా, నా చనుమొన బయటికి రాలేదు. ఇంకేదైనా పరిష్కారం ఉంటే చెప్పగలరు?

• ఒక సోదరి

కొందరిలో చనుమొన రొమ్ముల్లోకి పూర్తిగా చొచ్చుకుపోయి.. ఆ ప్రదేశంలో చిన్నపాటి గుంతలా కనిపిస్తుంది. అలాంటప్పుడు స్తన వ్యాయామంతో కొంతమేర సమస్య పరిష్కారం అవుతుంది. అయినా ఇబ్బంది తీరకపోతే ‘నిపిల్‌షీల్డ్‌’ అనే పరికరాన్ని ఉపయోగించవచ్చు. ఇది సాసర్‌ ఆకారంలో ఉంటుంది. మధ్యలో రంధ్రం ఏర్పాటుచేసి ఉంటారు. ఈ రంధ్రాన్ని చనుమొనపై వచ్చేలా రొమ్ముపై ఉంచి బిగుతైన బ్రా ధరించాలి. దీనివల్ల ఎరియోలా చుట్టూ ఒత్తిడి కలిగి చనుమొన బయటికి వచ్చేసి.. నిపిల్‌షీల్డ్‌లోని రంధ్రంలోకి వెళ్తుంది. దీన్ని గర్భధారణ మధ్యదశ నుంచి వాడాలి. మొదట్లో ఒకటి రెండు గంటలు ధరిస్తూ.. క్రమంగా రోజంతా వాడాలి.

గర్భధారణ సమయంలో చనుమొన కొంత మొద్దుబారి ఉంటుంది. దీంతో నొప్పిగా అనిపించదు. ఒకవేళ నొప్పిపుడితే కాసేపు తీసివేయవచ్చు. డిస్పోజబుల్‌ సిరంజ్‌తో చేసే ఇన్వైర్టెట్‌ నిపిల్‌ వైద్యం కూడా మంచి ఫలితాన్ని ఇస్తుంది.10 మి.లీ. ప్లాస్టిక్‌ డిస్పోజబుల్‌ సిరంజ్‌ ముందు భాగాన్ని బ్లేడుతో కోసిన తర్వాత పిస్టన్‌ను తీసేసి.. కోసిన వైపు రంధ్రంగుండా బయటి గొట్టంలోకి దూర్చాలి. సిరంజ్‌లోకి ప్రవేశించేలా.. గాలి దూరకుండా రొమ్ముపై ఉంచి, పిస్టన్‌ను కొంత బయటికి లాగి, ఒక నిమిషం పాటు ఉంచాలి. దీనివల్ల చనుమొన పొడవు పెరుగుతుంది. ఆ తరువాత సిరంజ్‌ తీసి శిశువుకు పాలు తాగించవచ్చు.