Visit:
Proteins | వేసవి కాలంలో శరీరానికి తేలికగా, చల్లదనాన్ని అందించేలా ఉండే ప్రోటీన్ ఆహారాలను ఎంపిక చేయడం చాలా ముఖ్యం. అధిక ఉష్ణోగ్రతల సమయంలో శరీరం తన ఉష్ణోగ్రతను నియంత్రించడానికి ఎక్కువ శ్రమ పడుతుంది. అందుకే ఈ సమయంలో తీసుకునే ఆహారం తేలికగా జీర్ణమయ్యేలా, శరీరానికి శక్తినిచ్చేలా ఉండాలి. కనుక ఇటువంటి సమయంలో ప్రోటీన్ ఎక్కువగా ఉండే ఆహారాలను తీసుకోవడం మంచిదని నిపుణులు సూచిస్తున్నారు. ప్రోటీన్ సాధారణంగా బరువు తగ్గడానికే ఉపయోగపడుతుందని అనుకుంటారు. కానీ వాస్తవానికి ఇది శరీర నిర్మాణానికి ప్రధాన మూలం. కండరాల పునరుద్ధరణ, రోగ నిరోధక శక్తి పెంపు, అలాగే ఎక్కువసేపు తృప్తిగా ఉండటానికి ఇది కీలకం. ముఖ్యంగా శరీరం ప్రోటీన్ను నిల్వ చేసుకోలేకపోవడం వల్ల ప్రతిరోజూ ఆహారంలో చేర్చడం అవసరం. వేసవిలో ప్రోటీన్ ఆహారాలను ఎంచుకునే సమయంలో అవి తేలికగా, హైడ్రేటెడ్గా, జీర్ణానికి సులభంగా ఉండేలా చూసుకోవాలి. దీంతో శరీరంలో అధిక వేడి పెరగకుండా, శక్తి స్థాయిలు సంతుల్యంగా ఉంటాయి. వేసవి కాలంలో తీసుకోవాల్సిన ప్రోటీన్ ఎక్కువగా ఉండే ఆహారాల గురించి పోషకాహార నిపుణులు వివరిస్తున్నారు.
లీన్ మీట్స్గా చెప్పబడే చికెన్ బ్రెస్ట్, చేపలు వేసవిలో మంచి ఎంపిక. ఇవి ప్రోటీన్ ఎక్కువగా, కొవ్వు తక్కువగా ఉండటం వల్ల శరీరానికి తేలికగా అనిపిస్తాయి. పప్పులు, శనగలు, పెసర్లు వంటి లెగ్యూమ్స్ కూడా ప్రోటీన్కు మంచి వనరులు. వీటిని సలాడ్స్లో, చల్లని వంటల్లో లేదా హమ్మస్లాంటి వంటకాల రూపంలో తీసుకోవచ్చు. శాకాహారులకు ఇవి ఉత్తమ ఎంపిక అని చెప్పవచ్చు. అలాగే గ్రీక్ యోగర్ట్ వేసవిలో చల్లగా తినడానికి అనువైన ప్రోటీన్ ఆహారం. దీన్ని పండ్లతో కలిపి లేదా స్మూతీగా తీసుకుంటే శరీరానికి తేలికగా ఉంటుంది. అలాగే ఇందులో ఉండే ప్రోబయోటిక్స్ జీర్ణక్రియకు సహాయపడతాయి. అదే విధంగా కాటేజ్ చీజ్ (పనీర్) కూడా ప్రోటీన్ ను సమృద్ధిగా కలిగి ఉంటుంది. దీన్ని కర్రీల్లో, పరాటాల్లో లేదా సలాడ్స్లో కలిపి తీసుకోవచ్చు. బాదం, ఆక్రోట్, చియా గింజలు, ఫ్లాక్స్ సీడ్స్ వంటి నట్లు, గింజలు ప్రోటీన్తో పాటు ఆరోగ్యకరమైన కొవ్వులను అందిస్తాయి. ఇవి మధ్యాహ్నం ఆకలి వేయకుండా నిరోధిస్తాయి.
మజ్జిగ (చాస్) వేసవిలో అత్యుత్తమ శీతల పానీయం. ఇది శరీరాన్ని చల్లగా ఉంచడంతోపాటు పొటాషియం, కాల్షియం వంటి ఖనిజాలను అందిస్తుంది. అలాగే గట్ హెల్త్కి కూడా ఉపయోగపడుతుంది. సత్తు (వేయించిన శనగ పిండి) వేసవిలో చాలా ప్రాచుర్యం పొందిన ఆహారం. ఇది శరీరానికి చల్లదనాన్ని ఇవ్వడమే కాకుండా ఫైబర్ను సమృద్ధిగా అందిస్తుంది. కినోవా పూర్తిస్థాయి ప్రోటీన్ వనరు. దీనిలో అన్ని అవసరమైన అమినో ఆమ్లాలు ఉంటాయి. దీనిని సలాడ్స్లో లేదా చల్లని బౌల్స్గా తీసుకోవచ్చు. టోఫు, టెంపె వంటి ప్లాంట్-బేస్డ్ ప్రోటీన్ ఆహారాలు కూడా వేసవిలో అనువైనవి. వీటిని గ్రిల్ చేసి లేదా సలాడ్స్లో కలిపి తీసుకోవచ్చు. వేసవి కాలంలో తేలికగా, శరీరాన్ని చల్లగా ఉంచే ప్రోటీన్ ఆహారాలను తీసుకోవడం ద్వారా శక్తివంతంగా, ఆరోగ్యంగా ఉండవచ్చు. సరైన ఆహారపు అలవాట్లు వేసవి ప్రభావాన్ని తగ్గించడంలో కీలక పాత్ర పోషిస్తాయని నిపుణులు సూచిస్తున్నారు.
