వ్యాయామంతో మెదడుకు బలం

వ్యాయామం వల్ల సవాలక్ష లాభాలు ఉంటాయని తెలుసు. మనసు మీద కూడా దాని ప్రభావం ఉంటుందని, గతంలో కొన్ని పరిశోధనలు నిరూపించాయి. ఆందోళనగా ఉన్నప్పుడు వ్యాయామం చేస్తే మనసుకు స్వస్థత చేకూరగలదనీ, నిద్రలేమి ఉన్నవారికి ఆ సమస్య దూరమవుతుందనీ ఎన్నో సిద్ధాంతాలు చెబుతున్నాయి. ఇప్పుడు వాటికి ఓ అరుదైన జోడింపూ వచ్చి చేరింది. కుర్చీలోంచి కదలకుండా ఉండేవారికంటే, కాస్త వ్యాయామం చేసినవారు మరింత సృజనాత్మకంగా ఆలోచించగలరని తేలింది. ఆస్ట్రియాలోని గ్రాజ్‌ విశ్వవిద్యాలయం వారు చెబుతున్న మాట ఇది. ఇందుకోసం పరిశోధకులు 79 మంది అభ్యర్థులకు ‘యాక్టివిటీ ట్రాకర్స్‌’ అమర్చారు. వాటి ద్వారా వారి రోజువారీ శ్రమను అంచనా వేశారు. అయిదు రోజులు గడిచిన తర్వాత ల్యాబ్‌కు పిలిచి కొన్ని సమస్యలు ఇచ్చారు. నడక మొదలుకొని ఏదో ఒక వ్యాయామం చేస్తున్నవారు, ఆ సమస్యలకు మరింత సృజనాత్మకమైన పరిష్కారాలు అందించటం గమనించారట. మరెందుకాలస్యం, కాళ్లకి పని చెప్పి మెదడుకు పదును పెడదాం!