Stress | మావాడు ఈమధ్య పరధ్యానంగా కనిపిస్తున్నాడు.. ఇదేమైనా పరీక్షలకు సంబంధించిన ఒత్తిడా?

మా బాబు పదోతరగతి చదువుతున్నాడు. పరీక్షల్లో మంచి మార్కులే వస్తున్నాయి. కానీ ఈమధ్య పరధ్యానంగా కనిపిస్తున్నాడు. ఇదేమైనా పరీక్షలకు సంబంధించిన ఒత్తిడా? లేక మానసిక సమస్యా? మాకు భయంగా ఉంది. మీరే పరిష్కారం చెప్పాలి.

Stress | మా బాబు పదోతరగతి చదువుతున్నాడు. పరీక్షల్లో మంచి మార్కులే వస్తున్నాయి. కానీ ఈమధ్య పరధ్యానంగా కనిపిస్తున్నాడు. ఇదేమైనా పరీక్షలకు సంబంధించిన ఒత్తిడా? లేక మానసిక సమస్యా? మాకు భయంగా ఉంది. మీరే పరిష్కారం చెప్పాలి.
– ఓ పాఠకురాలు

చదువుల్లో తగినంత ఒత్తిడి మంచిదే. పరీక్షల పట్ల కొంతమేర ఆందోళనా సహజమే. దీనివల్ల పిల్లలు లక్ష్యం మీద గురిపెడతారు. మీ బాబు విషయంలో ఆ తీవ్రత కొంత ఎక్కువగా ఉన్నట్టు తెలుస్తున్నది. నిజానికి, చదువుల ఒత్తిడి సమాజంలో తీవ్ర సమస్యగా మారుతున్నది. ఆత్మ హత్యలకూ దారితీస్తున్నది. రోజూ పదహారు గంటలు చదవడం వల్ల ఉపయోగం ఉండదు. ఏకధాటిగా చదివితే ఇట్టే అలసిపోతారు.

ఆ చదువులో నాణ్యత ఎంత అన్నదే ముఖ్యం. సరైన ప్రణాళికా అవసరం. ఆహారం, విశ్రాంతి మీద కూడా దృష్టిపెట్టాలి. ఈ విషయంలో తగిన జాగ్రత్తలు తీసుకోవడం కన్నవారిగా మీ బాధ్యత. అదే సమయంలో మీ బాబు ఆలోచనలు ఎలా ఉన్నాయి? సరిగా నిద్రపోతున్నాడా? సాధారణ వాతావరణంలోనూ చెమటలు పోస్తున్నాయా? అతిగా తినడం.. లేదంటే అసలే తినకపోవడం కూడా ఉన్నదా?.. ఈ విషయాల్ని కూడా గమనించండి. తనకు ఎలాగూ మంచి మార్కులు వస్తున్నాయి కాబట్టి, ఫలితాల విషయంలో ఆందోళన చెందొద్దని ధైర్యం చెప్పండి. మేమున్నాం.. అనే భరోసా ఇవ్వండి. అవసరమైతే మంచి సైకాలజిస్టు దగ్గరికి తీసుకెళ్లండి.

డాక్టర్‌ విజయానంద్‌
నియోనేటాలజిస్ట్‌ అండ్‌ పీడియాట్రీషియన్‌
రెయిన్‌బో చిల్డ్రన్స్‌ హాస్పిటల్స్‌