Visit:
Belly Fat | పొట్ట పెరగడాన్ని చాలామంది కేవలం అందానికి సంబంధించిన సమస్యగా మాత్రమే భావిస్తుంటారు. అయితే నడుము చుట్టుకొలత పెరగడం శరీరంలో మరో తీవ్రమైన సమస్యకు సంకేతం అయ్యే అవకాశాలు ఉంటాయని ఆరోగ్య నిపుణులు హెచ్చరిస్తున్నారు. ముఖ్యంగా పొట్ట భాగంలో కొవ్వు అధికంగా పేరుకుపోవడాన్ని ఫ్యాటీ లివర్ వ్యాధికి ప్రధాన హెచ్చరికగా పరిగణిస్తారు. ఈ వ్యాధి ప్రారంభ దశలో ఎలాంటి లక్షణాలు కనిపించకపోవడంతో దీనిని సైలెంట్ డిసీజ్ గా కూడా పిలుస్తారు. చికిత్స లేకుండా వదిలేస్తే కాలేయం వాపు, గాయాలు, లివర్ ఫెయిల్యూర్, చివరకు లివర్ క్యాన్సర్ వరకు దారితీసే ప్రమాదం ఉందని నిపుణులు హెచ్చరిస్తున్నారు. శరీరంలోని కొవ్వు అంతా ఒకేలా ఉండదు. చర్మం కింద కనిపించే కొవ్వుతో పోలిస్తే, పొట్టలోని అంతర్గత అవయవాల చుట్టూ పేరుకుపోయే విసెరల్ ఫ్యాట్ మరింత ప్రమాదకరం. ఈ కొవ్వు కాలేయంలో కొవ్వు పేరుకుపోయే అవకాశాన్ని పెంచి ఫ్యాటీ లివర్కు దారితీస్తుంది. అందుకే పెద్ద నడుము కేవలం బరువు పెరిగినట్లు కాకుండా కాలేయ ఆరోగ్యానికి సంబంధించిన హెచ్చరికగా కూడా భావించాలి.
బాడీ మాస్ ఇండెక్స్ (బీఎంఐ) సాధారణంగా ఉన్నవారికి కూడా ఫ్యాటీ లివర్ వచ్చే అవకాశం ఉందని నిపుణులు చెబుతున్నారు. బీఎంఐ సాధారణంగా ఉందని ఆరోగ్యంగా ఉన్నామని భావించడం సరైనది కాదు. ఎందుకంటే బీఎంఐ శరీరంలో కొవ్వు ఎక్కడ నిల్వ ఉందో తెలియజేయదు. ముఖ్యంగా నడుము, పొట్ట భాగంలో అధిక కొవ్వు పేరుకుపోవడం కాలేయంలో కొవ్వు పేరుకుపోవడానికి ప్రధాన కారణంగా మారుతుంది. భారతీయుల్లో తక్కువ బీఎంఐ ఉన్నప్పటికీ పొట్ట చుట్టూ కొవ్వు పేరుకుపోయే అవకాశం ఎక్కువగా ఉండటంతో ఈ ప్రమాదం మరింత అధికంగా ఉంటుంది. పొట్ట కొవ్వుతోపాటు టైప్-2 మధుమేహం, అధిక రక్తపోటు, అధిక కొలెస్ట్రాల్, ట్రైగ్లిసరైడ్స్ పెరగడం, ఇన్సులిన్ రెసిస్టెన్స్, శారీరక శ్రమ లేకపోవడం వంటి సమస్యలు ఉంటే ఫ్యాటీ లివర్ వచ్చే ప్రమాదం మరింత పెరుగుతుంది. ఈ పరిస్థితులన్నీ కలిసి ప్రస్తుతం మెటబాలిక్ డిస్ఫంక్షన్ అసోసియేటెడ్ స్టియాటోటిక్ లివర్ డిసీజ్ (MASLD)గా పిలిచే ఫ్యాటీ లివర్ వ్యాధికి దారితీస్తాయి.
ఫ్యాటీ లివర్ ప్రారంభ దశలో చాలామందికి ఎలాంటి లక్షణాలు కనిపించవు. అయితే కొందరిలో నడుము చుట్టుకొలత పెరగడం, నిరంతర అలసట, పొట్ట కుడి పైభాగంలో స్వల్ప అసౌకర్యం, కారణం లేకుండా బరువు పెరగడం, రక్త పరీక్షల్లో లివర్ ఎంజైమ్లు అధికంగా కనిపించడం వంటి సంకేతాలు ఉంటాయి. చాలా సందర్భాల్లో ఈ వ్యాధి సాధారణ ఆరోగ్య పరీక్షలు లేదా అల్ట్రాసౌండ్ పరీక్షల సమయంలోనే బయటపడుతుంది. ప్రారంభ దశలో గుర్తిస్తే ఫ్యాటీ లివర్ను జీవనశైలి మార్పులతో తిరిగి సాధారణ స్థితికి తీసుకురావచ్చు. రోజూ వేగంగా నడక, జాగింగ్, సైక్లింగ్, ఈత వంటి ఏరోబిక్ వ్యాయామాలతోపాటు బలం పెంచే వ్యాయామాలు చేయడం వల్ల కాలేయంలో కొవ్వు తగ్గుతుంది. అలాగే ప్రోటీన్, పీచు, పండ్లు, కూరగాయలు, తృణధాన్యాలు, ఆరోగ్యకరమైన కొవ్వులు ఉన్న సమతుల ఆహారం తీసుకోవడం మంచిది.
చక్కెర పానీయాలు, ప్రాసెస్డ్ ఫుడ్స్, రిఫైన్డ్ కార్బోహైడ్రేట్లు, జంక్ ఫుడ్ వంటి వాటిని తగ్గించడం ద్వారా కాలేయంలో కొవ్వు పేరుకుపోయే ప్రమాదాన్ని తగ్గించవచ్చు. ఇప్పటికే మధుమేహం, రక్తపోటు, కొలెస్ట్రాల్ సమస్యలు ఉన్నవారు వాటిని నియంత్రణలో ఉంచుకోవడం కూడా చాలా ముఖ్యం. అలాగే బరువు కంటే నడుము చుట్టుకొలతను క్రమం తప్పకుండా పరిశీలించడం మెటబాలిక్ ఆరోగ్యాన్ని అంచనా వేయడానికి మరింత ఉపయోగకరంగా ఉంటుంది. ముఖ్యంగా నడుము చుట్టుకొలత పెరుగుతోందని గమనిస్తే, దానికి తోడు మధుమేహం, అధిక రక్తపోటు లేదా కొలెస్ట్రాల్ సమస్యలు ఉంటే లివర్ పరీక్షల గురించి వైద్యులను సంప్రదించడం మంచిది. సాధారణ రక్త పరీక్షలు, అల్ట్రాసౌండ్ ద్వారా ఫ్యాటీ లివర్ను ప్రారంభ దశలోనే గుర్తించి సరైన చికిత్స ప్రారంభించవచ్చు. పొట్ట పెరగడాన్ని చిన్న సమస్యగా తీసుకోకుండా జీవనశైలిలో మార్పులు చేసుకోవడం, క్రమం తప్పకుండా ఆరోగ్య పరీక్షలు చేయించుకోవడం ద్వారా కాలేయంతోపాటు మొత్తం ఆరోగ్యాన్ని కాపాడుకోవచ్చని నిపుణులు సూచిస్తున్నారు.
