పెద్దన్నా వందనం

తెలంగాణ తల్లి పిలుపు తొలి అడుగులో అడుగు త్యాగాలజెండా చేతపట్టి జనగర్జనలో జనపదమై వెరవని పదంలా నిలబడి మహోద్యమంలో వెన్నుదన్నై తానొక స్తంభమై నిలిచాడు.

తెలంగాణ తల్లి పిలుపు
తొలి అడుగులో అడుగు
త్యాగాలజెండా చేతపట్టి
జనగర్జనలో జనపదమై
వెరవని పదంలా నిలబడి
మహోద్యమంలో వెన్నుదన్నై
తానొక స్తంభమై నిలిచాడు.

సంకల్పమే ఊపిరిగా
ఆశయాల గుండె సవ్వడిగా
ఆకాంక్ష జెండా వదలని ధీరుడు
కాలం గడిచినా
కర్తవ్యమే దిక్సూచిగా
నినాదాల్లో నిప్పురవ్వ,
నడకలో నిబద్ధతై
తెలంగాణ ఆత్మగౌరవమై
ప్రతిధ్వనించాడు

రాష్ట్ర సాధన పోరులో శ్రమ ఊరకపోలే
పునర్నిర్మాణ వికాసంలో
రామప్ప చెరువులా నిలబడ్డాడు
కుట్రల పళ్లాలకు తలొంచని
నర్సంపేట నగారా
తెలంగాణ రైతు
నాగలి జెండాగా నిలిచి
పోరు గాలై వీచి, ఓరుగల్లు
కెరటమైన యోధుడు

వానలు, పండుగలు వచ్చిపోతుంటయి
గాలిపతంగులు ఎగురుతుంటయి
మెరుపులు మెరుస్తుంటాయి
వేటికీ చేయిచాపని ఆశయం
తెలంగాణనే తన స్వప్నమన్న కిశోరం!

నెగడులా నిలువెత్తు మాట
మాటమీద నిలబడే కడలి
ఆరోగ్యాలు అనారోగ్యాలు
మంచిగున్న మామిడిపండ్లకే!

పూలపాన్పు కాదు
స్వరాష్ట్ర సాధనకై
నిలబడ్డ యోధ !
దుఃఖం కొత్తది గాదు
బాధలు నేటివి గావు
నిఖార్సయిన ఉద్యమకారుడు
హఠాత్తుగా వెళ్లిపోవడం
తెలంగాణ దోసిట్లో దుఃఖం

తెలంగాణ జెండా
ఎగిరే ప్రతి క్షణంలో
మీ త్యాగాల
ప్రతిధ్వని వినిపిస్తుంది.
ఆ విజయంలో ఉద్యమ సైనికుల
చెమట చుక్కలు,
కన్నీటి బిందువులు,
అచంచల సంకల్పమే
శాశ్వత సాక్ష్యాలు
పెద్దన్నా వందనం!

– వనపట్ల సుబ్బయ్య 9492765358