పూల సింగిడి

అంబరం నుంచి సంబురంగా అవని మీదికి వంగిన పూల సింగిడి నా తెలంగాణ ‘బతుకమ్మ’ తొమ్మిది రోజుల ఊసులతో తీరొక్క పువ్వుల నవ్వులు

September 26, 2022 / 12:03 PM IST

అంబరం నుంచి సంబురంగా
అవని మీదికి వంగిన
పూల సింగిడి
నా తెలంగాణ ‘బతుకమ్మ’
తొమ్మిది రోజుల ఊసులతో
తీరొక్క పువ్వుల నవ్వులు
వికసిస్తాయి కనువిందు చేస్తాయి
ఊయల ఊపులతో
ఉత్సవమొస్తుంది
చెరువులు బావులూ
నదీ ప్రవాహాలపై
రంగురంగుల పూల హంగులతో
బతుకమ్మ నాట్యమాడుతుంది
చిత్తూ చిత్తూల బొమ్మగా
శివుడీ ముద్దుల బొమ్మగా
బతుకమ్మ పూజలందుకుంటది
బంతి చామంతులు
గునుగు తంగేడు రుద్రాక్షలు
సీతమ్మ జడ రామబాణాల పూలు
పురివిప్పిన నెమళ్లవుతాయి
పుడమి పుడమంతా
పూలబుట్టయినట్టుంటది
అట్ల బతుకమ్మ అలిగిన బతుకమ్మ
వెన్నముద్దల బతుకమ్మ
వేడుకలు ఊయలలూగుతై
ఆటపాటలు పొద్దును దాటి
సద్దుల బతుకమ్మ సాగిపోతది
పల్లె సుద్దులను అద్దుకొని
పదిలమైపోతది
పాటల పూదోటైపోతది
సామూహిక సంరంభమై
కోలాటాల సవ్వడి జేస్తది
సమిష్టి జీవనగీతికై
సమైక్య భావన పతాకై
బతుకుపాటల్ని పల్లవిస్తది
కన్నీటి చెలమెలను తీసి కవ్వించుకుంటది
ఆత్మీయ చెలిమితో హత్తుకుంటది
బతుకమ్మ ఓ విజయగాథల అంగడి
సాంస్కృతిక పూల సింగిడి..!