సవాళ్లను ఎదురొడ్డి ‘కిసాన్‌’ ముందడుగు

అఖిల భారత కిసాన్‌ సభ 36వ జాతీయ మహాసభలు ఈ నెల 15 నుంచి 18 వరకు నల్లగొండలో జరుగనున్నాయి. 1936 ఏప్రిల్‌ 11న లక్నోలో అఖిల భారత కిసాన్‌ సభ ఏర్పాటై 2026 నాటికి 90 ఏండ్లు పూర్తయ్యాయి.

November 12, 2026 / 04:49 AM IST

అఖిల భారత కిసాన్‌ సభ 36వ జాతీయ మహాసభలు ఈ నెల 15 నుంచి 18 వరకు నల్లగొండలో జరుగనున్నాయి. 1936 ఏప్రిల్‌ 11న లక్నోలో అఖిల భారత కిసాన్‌ సభ ఏర్పాటై 2026 నాటికి 90 ఏండ్లు పూర్తయ్యాయి. అదేవిధంగా 1946 జూలై 4న ప్రారంభమైన చారిత్రాత్మక తెలంగాణ రైతాంగ సాయుధ పోరాటానికి కూడా 80 ఏండ్లు పూర్తయింది. ఆ చారిత్రక పోరాటానికి ప్రధాన కేంద్రాల్లో ఒకటైన నల్లగొండలో 36వ జాతీయ మహాసభలు నిర్వహించాలని నిర్ణయించడం ఈ మహాసభలకు ప్రత్యేక ప్రాధాన్యతను సంతరించిపెట్టింది.

దేశవ్యాప్తంగా సాగుతున్న రైతాంగ పోరాటాలను ఐక్యం చేయడం ద్వారానే అఖిల భారత కిసాన్‌ సభ ఏర్పడింది. ఆవిర్భావం నుంచి ఈ వారసత్వాన్ని కొనసాగిస్తూ దేశవ్యాప్తంగా అనేక చారిత్రక, విజయవంతమైన రైతాంగ పోరాటాలకు నాయకత్వం వహించింది. బ్రిటిష్‌ పాలన, కాంగ్రెస్‌, బీజేపీ ప్రభుత్వాలు, మతతత్వ, కులతత్వ, విభజనవాద శక్తులు, జమీందారులు, కార్పొరేట్‌ లాబీలు, వారి గూండాల క్రూరమైన అణచివేతను ధైర్యంగా ఎదుర్కొన్నది. ఉమ్మడి ఆంధ్రప్రదేశ్‌లోని తెలంగాణ, బెంగాల్‌లో తేభాగా, కేరళలో పున్నప్రా-వయలార్‌, ఉత్తర మలబార్‌, త్రిపురలో గణముక్తి పరిషత్‌ పోరాటం, బిహార్‌లో బకాశ్త్‌ ఉద్యమం, మహారాష్ట్రలో వార్లీ ఆదివాసీ తిరుగుబాటు, అస్సాంలోని సుర్మా లోయ పోరాటాలు కిసాన్‌ సభను దేశంలోనే అతిపెద్ద, ప్రభావవంతమైన రైతు సంఘంగా తీర్చిదిద్దాయి.

1991లో ప్రారంభమైన ఆర్థిక సరళీకరణ, ప్రైవేటీకరణ, ప్రపంచీకరణ విధానాల ఫలితంగా గత 35 ఏండ్ల్లలో కొత్త, తీవ్రమైన సవాళ్లు ఎదురయ్యాయి. భారత్‌తోపాటు ఇతర అభివృద్ధి చెందుతున్న దేశాలపై అసమానమైన ప్రపంచ వాణిజ్య సంస్థ ఒప్పందాలు, పెరుగుతున్న వ్యవసాయ పెట్టుబడి ఖర్చులు, పంటలకు గిట్టుబాటు ధరలు లభించకపోవడం, సంస్థాగత రుణాల సంక్షోభం ఈ కాలంలో తీవ్రమయ్యాయి. సంస్థాగత రుణాల్లో అధిక భాగం శక్తివంతమైన కార్పొరేట్‌ సంస్థల వైపు మళ్లింది.

అన్ని రంగాల్లో కార్పొరేట్‌ కంపెనీలు వేగంగా విస్తరించాయి. వినాశకరమైన నయా ఉదారవాద విధానాలకు 1991లో కేంద్రంలోని అప్పటి కాంగ్రెస్‌ ప్రభుత్వం శ్రీకారం చుట్టినప్పటికీ, 2014 తర్వాత మోదీ నాయకత్వంలోని బీజేపీ సర్కార్‌ రైతులు, కార్మిక వర్గ ప్రయోజనాలకు వ్యతిరేకంగా మరింత తీవ్రమైన సవాళ్లను సృష్టించింది. సామ్రాజ్యవాదులు, కార్పొరేట్‌ సంస్థల ప్రయోజనాలను ప్రోత్సహించింది. తీవ్రమైన వ్యవసాయ సంక్షోభం తలెత్తింది. ఫలితంగా గత మూడు దశాబ్దాల్లో 4 లక్షలకు పైగా రైతుల ఆత్మహత్యలకు కారణమైంది. వీరిలో లక్ష మందికి పైగా మోదీ నాయకత్వంలోని బీజేపీ పాలనలోనే ఆత్మహత్య చేసుకున్నారు. పేదరికం, నిరుద్యోగం, ఆకలి బాధలు తీవ్రంగా పెరిగాయి. అదే సమయంలో ఆదానీ, అంబానీ వంటి కొద్దిమంది కార్పొరేట్‌ సంపన్నుల ఆదాయం, సంపద విపరీతంగా పెరిగాయి. 2025 ప్రపంచ ఆకలి సూచికలో 123 దేశాల్లో భారత్‌ 102వ స్థానంలో నిలిచింది.

2014 తర్వాత దేశవ్యాప్తంగా రైతాంగ పోరాటాలు తీవ్రతరమయ్యాయి. మూడు వివాదాస్పద వ్యవసాయ చట్టాలకు వ్యతిరేకంగా, సీ2+50 శాతం ప్రాతిపదికన లాభదాయకమైన కనీస మద్దతు ధర, సంపూర్ణ రుణ విముక్తి, పంటల బీమా పథకంలో సమగ్ర సంస్కరణలు, పెన్షన్‌, గ్రామీణ పేదలకు ఉపాధి కల్పన, సమూల భూ సంస్కరణలు, అటవీ హక్కుల చట్టం కఠినంగా అమలు కోసం కిసాన్‌ సభ స్వతంత్రంగా, ఐక్యంగానూ అనేక పోరాటాలు నిర్వహించింది. 2014 తర్వాత దేశంలోని అత్యంత ముఖ్యమైన గ్రామీణ ప్రజా ఉద్యమాల్లో కొన్నింటికి కిసాన్‌ సభ నాయకత్వం వహించింది.

మోదీ నాయకత్వంలోని కేంద్ర ప్రభుత్వానికి వ్యతిరేకంగా జాతీయ స్థాయిలో రైతులు సాధించిన తొలి పెద్ద విజయవంతమైన ఐక్య పోరాటం 2015లో జరిగిన ప్రతిగామి భూసేకరణ ఆర్డినెన్స్‌కు వ్యతిరేక ఉద్యమం. భూమి హక్కుల ఉద్యమం నాయకత్వంలో జరిగిన ఈ పోరాటంలో కిసాన్‌ సభ కీలక భాగస్వామిగా ఉన్నది. తీవ్ర పోరాటం ఫలితంగా 2015 ఆగస్టులో కేంద్రం ఆ ఆర్డినెన్స్‌ను వెనుకకు తీసుకున్నది. 2020 నవంబర్‌ 26న ఢిల్లీ సరిహద్దుల్లో ప్రారంభమై, 2021 డిసెంబర్‌ 11న ముగిసిన చారిత్రాత్మక ఐక్య రైతాంగ పోరాటం భారతదేశ చరిత్రలో ఇప్పటివరకు జరిగిన అతిపెద్ద, సుదీర్ఘమైన, అత్యంత ప్రభావవంతమైన జాతీయ రైతు ఉద్యమం. కార్మిక-కర్షక ఐక్యతను మరింత బలోపేతం చేయడానికి కేంద్ర కార్మిక సంఘాలు, వ్యవసాయ కార్మిక సంఘాలను కూడా ఈ ఉద్యమంలో భాగస్వాములను చేయడానికి సంయుక్త కిసాన్‌ మోర్చా చొరవ తీసుకున్నది. మహిళలు, యువత, విద్యార్థులు, వ్యాపార సంఘాల మద్దతును సమీకరించింది. నేడు కూడా దేశవ్యాప్తంగా లక్షలాది మంది రైతుల పోరాటాలు, పట్టుదల, ఆశలకు కిసాన్‌ సభ ప్రతీకగా నిలుస్తున్నది. క్లిష్టపరిస్థితుల్లోనూ సంఘటిత ప్రయత్నాలు అర్థవంతమైన మార్పులను తీసుకురాగలవని ఇది నిరూపిస్తున్నది.

90 ఏండ్ల ఘనమైన చరిత్ర సామాజిక మార్పు కోసం కొత్త సంకల్పాన్ని కలిగించాలి. తెలంగాణ సాయుధ రైతాంగ పోరాట 80వ వార్షికోత్సవం సందర్భంగా ఆర్థికంగా దోపిడీ, సామాజికంగా అణచివేతకు గురవుతున్న ప్రజల పట్ల మన నిబద్ధత మరింత బలపడాలి. నల్లగొండ మహాసభల నుంచి మన సుదీర్ఘ ప్రయాణంలో మరో దృఢమైన ముందడుగు ప్రారంభం కావాలి. 2036లో కిసాన్‌ సభ తన శతాబ్ది ఉత్సవాల దిశగా పయనిస్తున్నది. కార్మిక-కర్షక ఐక్యత, సమూల ప్రత్యామ్నాయ విధానాల కోసం కిసాన్‌ సభ ఇచ్చే పిలుపు గ్రామీణ భారతదేశంలో నిజమైన ‘స్వరాజ్‌’ సాధనకు మార్గదర్శకంగా నిలుస్తుంది. న్యాయమైన, సార్వభౌమ, ప్రజాస్వామిక, లౌకిక, సమాఖ్య, సోషలిస్టు భారతదేశ స్వప్నాన్ని కనడానికి, ఆ లక్ష్య సాధన కోసం కృషి చేయడానికి లక్షలాది మందికి స్ఫూర్తినిస్తున్నది.