Video recording | ఇంటర్‌నెట్‌ మరమ్మతుల కోసం వచ్చి..

బంజారాహిల్స్ : ఇంటర్‌నెట్‌ మరమ్మతులు చేసేందుకు వచ్చి ఓ మహిళ స్నానం చేస్తున్న వీడియోను తీసేందుకు ప్రయత్నించిన వ్యక్తిని బంజారాహిల్స్​‍ పోలీసులు అరెస్ట్ చేశారు. పోలీసులు తెలిపిన వివరాల ప్రకారం.. మల్లెపల్లి సమీపంలోని ఇందిరానగర్‌కు చెందిన కే.మార్టిన్‌ (19) బంజారాహిల్స్​‍లోని యాక్ట్ ఫైబర్‌ నెట్‌ సంస్థలో టెక్నీషియన్‌గా పనిచేస్తున్నాడు.

బంజారాహిల్స్​‍ రోడ్‌ నెం 2లోని ఓ అపార్ట్‌మెంట్‌లో ఇంటర్‌నెట్‌ సరిగా పనిచేయడం లేదని ఫిర్యాదు రావడంతో మంగళవారం మధ్యాహ్నం అక్కడకు వెళ్లాడు. రోడ్డుమీద ఉన్న స్థంభానికి నిచ్చెన పెట్టి కేబుల్స్​‍ పరిశీలిస్తున్న మార్టిన్‌ పక్కనే ఉన్న ఇంట్లో ఓ మహిళ (45) బాత్‌రూమ్‌లో స్నానం చేస్తున్న విషయాన్ని గమనించాడు.

దాంతో తనవద్ద ఉన్న సెల్‌ఫోన్‌తో వీడియో రికార్ట్ చేయ‌డం ప్రారంభించాడు. ఈ విషయాన్ని గమనించిన మహిళ అప్రమత్తమయి ఇంట్లోనే ఉన్న భర్తకు చెప్పింది. దాంతో బయటకు వచ్చిన బాధితురాలి భర్త స్థానికుల సాయంతో నిందితుడు మార్టిన్‌ను పట్టుకుని బంజారాహిల్స్​‍ పోలీసులకు అప్పగించారు. ఈ మేరకు నిందితుడిపై ఐపీసీ 354 సెక్షన్‌ కింద కేసు నమోదు చేసిన పోలీసులు అతడిని అరెస్ట్ చేశారు.