భర్త ముందే భార్యపై ముగ్గురు సామూహిక లైంగికదాడి

లక్నో: భర్త ముందే భార్యపై ముగ్గురు సామూహిక లైంగికదాడికి పాల్పడ్డారు. అంతేగాక ఈ వికృతచేష్టను తమ మొబైల్‌ ఫోన్‌లో వీడియో తీశారు. అనంతరం వారి వద్ద ఉన్న డబ్బులు, బంగారం దోచుకుని పారిపోయారు. ఉత్తరప్రదేశ్‌లోని ఆగ్రా జిల్లాలో ఈ దారుణం జరిగింది. ఎట్మాద్‌పూర్‌ పోలీస్‌ స్టేషన్‌ పరిధికి చెందిన ఒక యువతి భర్తతో కలిసి బైక్‌పై సోమవారం సాయంత్రం ఆరు గంటలకు ఎట్మౌడౌలా ప్రాంతంలోని తన తల్లిదండ్రుల ఇంటికి వెళ్తున్నది.

మార్గమధ్యలో ముగ్గురు వ్యక్తులు వారి బైక్‌ను అడ్డగించి నిలువరించారు. ఆ దంపతులపై దాడి చేసి వారిని బలవంతంగా సమీపంలోని నిర్మాణుష్య ప్రాంతానికి తీసుకెళ్లారు. అక్కడ భర్తను కొట్టి అతడి ఎదుటే భార్యపై ఆ ముగ్గురు సామూహిక లైంగికదాడికి పాల్పడ్డారు. ఈ చర్యను తమ మొబైల్‌ ఫోన్‌లో చిత్రీకరించారు. అనంతరం వారి వద్ద రూ.10,000 నగదు, మహిళ చెవి రింగులు, ఇతర వస్తువులు తీసుకొని పారిపోయారు.

జరిగిన దారుణంపై భార్యాభర్తలు పోలీసులకు మంగళవారం ఫిర్యాదు చేశారు. దీంతో ఆమెను వైద్య పరీక్షల కోసం ఆసుపత్రికి పంపారు. ఫిర్యాదు వివరాల ప్రకారం ఇద్దరు వ్యక్తులతోపాటు గుర్తు తెలియని మరొకరిపై కేసు నమోదు చేశారు. నిందితులను అరెస్ట్‌ చేసేందుకు ఒక పోలీస్ బృందాన్ని ఏర్పాటు చేశారు.