ఉస్మానియా యూనివర్సిటీ : పీజీ చదువుతున్న విద్యార్థినిని పెళ్లి చేసుకుంటానని మోసం చేసిన ఘటన ఉస్మానియా యూనివర్సిటీ పోలీస్ స్టేషన్ పరిధిలో చోటు చేసుకుంది. నెలరోజుల ఆలస్యంగా ఈ ఘటన వెలుగుచూసింది.
పోలీసులు తెలిపిన వివరాల ప్రకారం నగరంలోని ఒక ప్రైవేట్ కళాశాలలో పీజీ చదువుతున్న ఒక విద్యార్థిని గతేడాది ఏప్రిల్లో తన ప్రాజెక్టు నిమిత్తం ఉస్మానియా యూనివర్సిటీ జెనిటిక్స్ విభాగంలోని ప్రయోగశాలకు వచ్చింది. బాధితురాలికి అక్కడే పరిశోధనలు చేసుకుంటున్న కౌశిక్ (33) పరిచయమయ్యాడు.
ఆమెకు మాయమాటలు చెప్పి బుట్టలో వేసుకున్నాడు. పెళ్లి చేసుకుంటానని చెప్పి ప్రయోగశాలలోనే ఆమెపై లైంగికదాడి చేశాడు. ఉన్నత చదువులు చదువుతున్నాడనే ఉద్దేశంతో అతడిని పూర్తిగా విశ్వసించిన అమ్మాయి పెళ్లి విషయం అడిగేసరికి ముఖం చాటేశాడు. బాధితురాలిని దూరం పెట్టడం ప్రారంభించాడు.
నిలదీసేసరికి తన తల్లిదండ్రులు వివాహానికి అంగీకరించడం లేదంటూ స్పష్టం చేశాడు. వాళ్లు చనిపోతామని బెదిరిస్తున్నా రని చెప్పి చేతులు దులుపుకున్నాడు. అప్పటికే విషయం అర్థమైన బాధితురాలు పోలీసులను ఆశ్రయించింది. గత నెల 3న ఓయూ పోలీసులు కౌశిక్పై అత్యాచారం, ఎస్సీ, ఎస్టీ అట్రాసిటీ కేసులు నమోదు చేసి, దర్యాప్తు చేస్తున్నారు.