కన్యత్వ పరీక్షలో వధువు విఫలం… రూ.10 లక్షల జరిమానా విధింఫు

జైపూర్‌: కన్యత్వ పరీక్షలో వధువు విఫలమైంది. దీంతో పంచాయతీ నిర్వహించి ఆమెకు రూ.10 లక్షల జరిమానా విధించారు. రాజస్థాన్‌లోని భిల్వారా జిల్లాలో ఈ దారుణం జరిగింది. ఈ ఏడాది మే 11న భిల్వారా నగరానికి చెందిన 24 ఏళ్ల యువతికి బాగోర్‌కు చెందిన ఒక వ్యక్తితో వివాహం జరిగింది. అయితే ఆ సమాజం ఆచరించే ‘కుక్డి’ విధానంలో నిర్వహించిన కన్యత్వ పరీక్షలో వధువు విఫలమైంది. దీంతో అత్తింటివారు ఆమెను నిలదీశారు. అయితే పొరుగున నివసించే ఒక వ్యక్తి పెళ్లికి ముందు తనపై అత్యాచారం చేసినట్లు వధువు చెప్పింది. దీంతో భర్త, అత్తమామలు ఆమెను కొట్టారు. అనంతరం ఆ గ్రామ పెద్దల సమక్షంలో పంచాయతీ పెట్టారు. అయితే లైంగిక దాడిపై మే 18న పోలీసులకు ఫిర్యాదు చేసినట్లు వధువు తల్లిదండ్రులు తెలిపారు.

మరోవైపు మే 31న ఆ గ్రామంలో మరోసారి పంచాయతీ నిర్వహించారు. పరిహారం పేరుతో వధువు, ఆమె కుటుంబానికి రూ.10 లక్షల జరిమానా విధించారు. ఆ డబ్బులు చెల్లించనందుకు వధువుతోపాటు ఆమె కుటుంబాన్ని అత్తింటి వారు వేధించారు. నూతన వధువును ఆమె పుట్టింటికి పంపారు.

వధువు కుటుంబం ఫిర్యాదుతో పోలీసులు ఈ సంఘటనపై దర్యాప్తు జరిపారు. వారి చెప్పింది నిజమని తేలడంతో వధువు భర్త, మామపై కేసు నమోదు చేసినట్లు పోలీస్‌ అధికారి అయూబ్ ఖాన్ తెలిపారు.