దారుణం : పూజ‌ల పేరుతో మ‌హిళ‌పై న‌కిలీ బాబా లైంగిక దాడి

పూజ‌ల పేరుతో మహిళ‌పై లైంగిక దాడికి పాల్ప‌డిన స్వామీజీగా చెప్పుకునే న‌కిలీ బాబా (58)ను పోలీసులు అరెస్ట్ చేశారు.

ముంబై : పూజ‌ల పేరుతో మహిళ‌పై లైంగిక దాడికి పాల్ప‌డిన స్వామీజీగా చెప్పుకునే న‌కిలీ బాబా (58)ను పోలీసులు అరెస్ట్ చేశారు. ఆమె మైన‌ర్‌గా ఉన్న 2019 నుంచి నిందితుడు ప‌లుమార్లు బాధితురాలిపై లైంగిక దాడికి పాల్ప‌డ్డాడు. బాధితురాలి ఫిర్యాదు ఆధారంగా ద‌ర్యాప్తు చేప‌ట్టిన పోలీసులు నిందితుడిని అదుపులోకి తీసుకున్నారు.

బాలిక కుటుంబ స‌భ్యులు త‌మ స‌మ‌స్య‌ల‌ను ప‌రిష్క‌రించాల‌ని కొన్నేండ్ల కింద‌ట స్వామీజీగా చెప్పుకునే సురేష్ కుమార్ ర‌వీంద్ర నారాయ‌ణ్ అవ‌స్తిని సంప్ర‌దించారు. పూజ‌ల పేరుతో 2019 నుంచి బాధితురాలిపై ప‌లుమార్లు లైంగిక దాడుల‌కు పాల్ప‌డ్డాడు. ఆమె అభ్యంత‌ర‌క‌ర ఫోటోల‌ను తీసి వాటిని ఇంట‌ర్‌నెట్‌లో అప్‌లోడ్ చేస్తాన‌ని బెదిరిస్తూ ఈ దారుణానికి ఒడిగ‌ట్టాడు.

బాధితురాలు స్వామీజీ ఆగ‌డాల‌ను కుటుంబ‌స‌భ్యుల‌కు తెల‌ప‌డంతో వారు పోలీసుల‌కు ఫిర్యాదు చేశారు. నిందితుడిపై పోక్సో స‌హా ప‌లు సెక్ష‌న్ల కింద కేసు న‌మోదు చేసిన పోలీసులు త‌దుప‌రి ద‌ర్యాప్తు ముమ్మ‌రం చేశారు.