కుక్క పిల్లతోపాటు.. 9వ అంతస్తు నుంచి పడి బాలిక మృతి

లక్నో: కుక్క పిల్లను కాపాడబోయిన 12 ఏండ్ల బాలిక, దానితోపాటు 9వ అంతస్తు పైనుంచి పడి మరణించింది. ఢిల్లీకి సమీపంలోని ఉత్తరప్రదేశ్‌ ఘజియాబాద్‌లో ఈ ఘటన జరిగింది. గౌర్ హోమ్స్ హౌసింగ్ సొసైటీ 9వ అంతస్తులోని అపార్ట్‌మెంట్‌లో ఉంటున్న జ్యోత్న ఏడవ తరగతి చదువుతున్నది. బుధవారం మధ్యాహ్నం ఇంట్లో కుక్క పిల్లతో ఆడుకుంటున్నది. ఈ క్రమంలో బాల్కానీకి ఏర్పాటు చేసిన నెట్‌లో అది చిక్కుకున్నది.

కాగా, కుక్క పిల్లను నెట్‌ నుంచి తీసేందుకు ప్రయత్నించిన జ్యోత్స అదుపు తప్పి దానితో సహా బాల్కానీ నుంచి కిందపడింది. గమనించిన తల్లి హడావుడిగా కిందకు వచ్చి చూడగా ఆమె కూతురు, కుక్క పిల్ల రక్తం మడుగుల్లో పడి ఉన్నారు. బాలికను ఆసుపత్రికి తరలించగా అప్పటికే మరణించినట్లు వైద్యులు తెలిపారు. మరోవైపు ఆ కుక్క పిల్ల కూడా చనిపోయింది. సమాచారం అందుకున్న పోలీసులు ఘటనా స్థలానికి వెళ్లి పరిశీలించారు. కేసు నమోదు చేసి దర్యాప్తు చేస్తున్నారు.