లైంగిక దాడి కేసులో బాలీవుడ్ సింగ‌ర్‌పై ఎఫ్ఐఆర్ న‌మోదు

కాస్ట్యూమ్ స్టైలిస్ట్‌పై లైంగిక దాడి ఆరోప‌ణ‌ల‌కు సంబంధించి బాలీవుడ్ సింగ‌ర్‌, కంపోజ‌ర్ రాహుల్ జైన్‌పై ఎఫ్ఐఆర్ న‌మోదైంది.

ముంబై : కాస్ట్యూమ్ స్టైలిస్ట్‌పై లైంగిక దాడి ఆరోప‌ణ‌ల‌కు సంబంధించి బాలీవుడ్ సింగ‌ర్‌, కంపోజ‌ర్ రాహుల్ జైన్‌పై ఎఫ్ఐఆర్ న‌మోదైంది. రాహుల్ త‌న ముంబై ఫ్లాట్‌లో 30 ఏండ్ల కాస్ట్యూమ్ స్టైలిస్ట్‌పై లైంగిక దాడికి పాల్ప‌డ్డాడ‌నే ఆరోప‌ణ‌లున్నాయి. ఇన్‌స్టాగ్రాంలో త‌న‌ను ప‌రిచ‌యం చేసుకున్న రాహుల్ జైన్ త‌న వ‌ర్క్ గురించి ప్ర‌శంస‌లు గుప్పించాడ‌ని అంధేరిలోని త‌న ఫ్లాట్‌కు రావాల‌ని ఆహ్వానించాడ‌ని కాస్ట్యూమ్ స్టైలిస్ట్ పేర్కొంది.

ఆగ‌స్ట్ 11న ఆమె రాహుల్ జైన్ ఫ్లాట్‌కు రాగా త‌న వార్డ్‌రోబ్ చూపిస్తాన‌నే సాకుతో కాస్ట్యూమ్ స్టైలిస్ట్‌ను బెడ్‌రూంలోకి తీసుకువెళ్లి లైంగిక దాడికి పాల్ప‌డ్డాడ‌ని అభియోగాలు న‌మోద‌య్యాయి. పోలీసులు తెలిపిన వివ‌రాల ప్ర‌కారం మ‌హిళ ఫ్రీలాన్స్ కాస్ట్యూమ్ స్టైలిస్ట్‌గా ప‌నిచేస్తోంది. లైంగిక దాడిని ప్ర‌తిఘ‌టించ‌డంతో రాహుల్ త‌న‌ను వేధించాడ‌ని, ఆధారాల‌ను ధ్వంసం చేసేందుకు ప్ర‌య‌త్నించాడ‌ని బాధితురాలు పేర్కొంది.

మ‌హిళ ఫిర్యాదు ఆధారంగా కేసు న‌మోదు చేసి ద‌ర్యాప్తు వేగ‌వంతం చేశామ‌ని పోలీసులు తెలిపారు. కాగా త‌న‌పై లైంగిక దాడి ఆరోప‌ణ‌లు నిరాధార‌మ‌ని రాహుల్ జైన్ తోసిపుచ్చారు. ఆ మ‌హిళ ఎవ‌రోకూడా త‌న‌కు తెలియ‌ద‌ని, ఆరోప‌ణ‌లు పూర్తిగా అస‌త్యాల‌ని అన్నారు. కాగా త‌న‌పై లైంగిక దాడికి పాల్ప‌డి బ‌ల‌వంతంగా అబార్ష‌న్ చేయించాడ‌ని ఓ బాలీవుడ్ పాట‌ల ర‌చ‌యిత గ‌త ఏడాది అక్టోబ‌ర్‌లో రాహుల్ జైన్‌పై ఆరోప‌ణ‌లు చేశారు.