లైంగిక వేధింపుల కేసు : న‌టుడు విజ‌య్ బాబుపై అరెస్ట్ వారెంట్ జారీ

లైంగిక వేధింపుల కేసులో మ‌ళ‌యాళ న‌టుడు, నిర్మాత విజ‌య్ బాబుపై అరెస్ట్ వారెంట్ జారీ త‌ర్వాత కేర‌ళ పోలీసులు నిందితుడి కోసం గాలింపు చ‌ర్య‌లు ముమ్మ‌రం చేస్తున్నారు.

తిరువ‌నంత‌పురం : లైంగిక వేధింపుల కేసులో మ‌ళ‌యాళ న‌టుడు, నిర్మాత విజ‌య్ బాబుపై అరెస్ట్ వారెంట్ జారీ త‌ర్వాత కేర‌ళ పోలీసులు నిందితుడి కోసం గాలింపు చ‌ర్య‌లు ముమ్మ‌రం చేస్తున్నారు. విజ‌య్ బాబు త‌న‌పై లైంగిక దాడుల‌కు పాల్ప‌డ‌టంతో పాటు వేధింపుల‌కు గురిచేశాడ‌ని వర్ధ‌మాన న‌టి ఫిర్యాదు చేయ‌డం మ‌ళ‌యాళ సినీ ప‌రిశ్ర‌మ‌లో క‌ల‌కలం రేపింది. ఎర్నాకుళంలోని స్ధానిక కోర్టు విజ‌య్ బాబుపై అరెస్ట్ వారెంట్ జారీ చేయ‌డంతో రెడ్ కార్న‌ర్ నోటీసు కూడా జారీ చేయనున్నారు.

నేరాల‌పై విచారణ ఎదుర్కొనేందుకు నిందితుల‌ను అరెస్ట చేసి స్వ‌దేశాల‌కు త‌ర‌లించే ప్ర‌క్రియ‌లో భాగంగా ఇంట‌ర్‌పోల్ రెడ్ కార్న‌ర్ నోటీసు జారీ చేస్తుంది. అరెస్ట్ వారెంట్ జారీ కావ‌డంతో న‌టుడు నిర్మాత విజ‌య్ బాబు ఫోటోలు, కేసు వివ‌రాలు అంత‌ర్జాతీయ క్రిమిన‌ల్ పోలీసు సంస్ధ (ఇంటర్‌పోల్‌) వెబ్‌సైట్‌లో ప్ర‌త్య‌క్షం కానున్నాయి. రెడ్ కార్న‌ర్ నోటీస్ జారీ కాగానే విజ‌య్ బాబును దుబాయ్ పోలీసులు నిర్బంధంలోకి తీసుకుని భార‌త్‌కు త‌ర‌లిస్తారు.

అయితే క్రిమిన‌ల్ కేసుల్లో నిందితుల‌ను స్వ‌దేశానికి అప్ప‌గించేలా భార‌త్‌తో ఒప్పందం చేసుకోని దేశాల్లో విజ‌య్ బాబు త‌ల‌దాచుకునే అవ‌కాశం లేక‌పోలేద‌ని భావిస్తున్నారు. ఇక విజ‌య‌బాబు ఈ ఏడాది మార్చి 13 నుంచి ఏప్రిల్ 14 వ‌ర‌కూ త‌న‌పై లైంగిక దాడుల‌కు పాల్ప‌డ్డాడ‌ని, సినిమాల్లో మెరుగైన అవ‌కాశాలు ఇప్పిస్తానంటూ త‌న ఇష్టానికి వ్య‌తిరేకంగా లైంగిక వేధింపుల‌కు గురిచేశాడ‌ని బాధితురాలు ఏప్రిల్ 22న పోలీసుల‌కు పిర్యాదు చేసింది.